Аюулгүй байдал, гадаад бодлогын байн­гын хорооны ажлын хэсгийн гишүүд өнөөдөр хэвлэлийн хурал хийлээ. Тус ажлын хэсэг нь Оюутолгойн ордыг ашиглах техник, эдийн засгийн үндэслэлтэй холбогдуулан гаргасан дүгнэлтийг ажлын хэсгээр авч хэлэлцэж дүгнэлт гаргасан байна. Ажлын хэсгээс гарсан дүгнэлтийг АБГББХ-оо авч хэлэлцээд байнгын хорооны гишүүд санал нэгтэйгээр дэмжсэн байна. Харин ажлын хэсгийн дүгнэлт гарах гэж удсан талаар Ш.Сайхансамбуу гишүүн “Засгийн газар Ашигт малтмалын тухай хууль санаачлан УИХ-д өргөн барих гэж байгаа. Тэр болтол түр хүлээгээч гэсэн санал тавьсан. Гэтэл энэ асуудлаас болоод хугацаа алдаж удлаа” гэж тайлбарласан юм.

Мөн гэнэтийн ашгийн 68 хувийн татварыг энэ оны нэгдүгээр сарын 1-ны өдрөөс эхэлж хүчингүй болгосон нь хөрөнгө оруулагч тал өөрийн ашиг сонирхолд тааруулан Монгол Улсын хуулийг өөрчлүүлсэн гэж хэллээ.

УИХ Ашигт малтмалын тухай хуульд нэмэлт өөрчлөлт оруулан ашигт малтмалын нөөц ашигласны төлбөрийн таван хувь дээр 15 хувийг нэмээд 20 хувь болгосон  Мөн уул уурхайгаас орж ирж байгаа бүтээгдэхүүнийг ангилдаггүй байсан бол өөрчлөлт оруулсанаар бүтээгдэхүүий хүдэр хэвээр нь гаргавал 30 хувь, баяжмал хэлбэрээр бол хуучин байсан 5 хувь дээр шинээр нэмэгдсэн 15 хувьтай нийлээд 20 хувь, харин эцсийн бүтээгдэхүүнд тохиолдолд 5 хувийн татвартай байхаар тогтоосон. Харин энэхүү роялтийн татварыг Оюутолгойгоос авах талаар Гэрээнд өөрчлөлт оруулах үүргийг Засгийн газарт өгөөд байгаа билээ.

Оюутолгойн орд газар 45 сая тонн нөөцтэй. Гэтэл хөрөнгө оруулагчид шинээр ТЭЗҮ-д тусгахдаа 19 сая тонн гэж оруулж ир­сэн байна. Ажлын хэсэг энэ асуудлыг авч үзээд 19 сая тонныг 31 сая тонн болгожээ.