Дэлхийн алдарт хөлбөмбөгчин, Унгарын шигшээ багийн домогт тоглогч Ференц Пушкашийн нэрэмжит академид Монголын хөлбөмбөгчид 2 дахь жилдээ суралцахаар боллоо. Өнгөрсөн онд Монголын хөлбөмбөгийн холбоо Б.Амгаланбат, Г.Ганбаяр, О.Хантэнгэр, Д.Тэмүүлэн нарын 4 хүүхдэд анх удаа “Пушкаш академи”-д суралцах боломжийг олгож байсан билээ. Анх удаа хилийн чанадад хөлбөмбөгөөр суралцсан дөрвөн хүүхдээс Г.Ганбаяр “Сузуки цом”-оос хүрэл медаль хүртэж, өндөр амжилт гаргасан билээ. Улмаар Г.Ганбаяр ‘Пушкаш академи’-ийн тоглогч болж 600 еврогийн цалинтай тоглох болсон.Энэ жилийн сонгон шалгаруулалт 5-р сард болж, клубүүд болон хөдөө орон нутгийн авьяаслаг хөлбөмбөгчдөөс бүрдсэн 50 гаруй хүүхэд оролцсон юм.

Сонгон шалгаруулалтын хариу гарахад Дархан-Уул аймгийн П.Ууганбаяр, “Дэрэн” клубийн А.Дөлгөөн нар тэнцсэн байна. Өнөөдөр МХБХ эдгээр хүүхдүүдтэй гэрээ байгуулж, хэвлэлийнхэнд албан ёсоор танилцууллаа. Хэвлэлийн бага хуралд П.Ууганбаяр, А.Дөлгөөн нараас гадна МХБХ-ны техникийн хэлтсийн захирал Ш.Жаргалсайхан, Унгар улсаас Монгол улсад суугаа элчин сайдын яамны консул Кароли Домонкос нар оролцсон юм. МХБХ-той хамтран ажиллагч ‘Их Монгол’ сан хүүхдүүдийн замын зардлыг ивээн тэтгэхээр болжээ. МХБХ-ны ерөнхийлөгч А.Ганбаатар хүүхдүүдтэй эцэг эхийнх нь хамт уулзаж, онгоцны тасалбарыг нь гардуулан өгсөн байна. Тус академид суралцах жилийн төлбөр 15000 америк долларын үнэтэй юм. Цаашдаа эдгээр хүүхдүүдэд Дархан-Уул аймгийн нутгийн зөвлөл болон ‘Дэрэн’ клуб туслалцаа дэмжлэг үзүүлнэ хэмээн найдаж байна.

Т.Мөнх