Хакүхо итгэл төгс тэргүүлсэн хэвээр

Японы мэргэжлийн сүмогийн долдугаар сарын тэмцээн ирэх ням гаригт өндөрлөнө. Нагоя хотноо болж буй зуны башё өндөрлөхөд таван өдрийн барилдаан үлдлээ. Өнөөдөр башёгийн 10 дахь өдрийн барилдаан болж, их аварга Хакүхо М.Даваажаргал Чиёошомагаар ээлжит даваагаа авлаа. Ийнхүү башёг Хакүхо 10 даваатайгаар ганцаараа тэргүүлсэн хэвээр байгаа бол Болгарын бөх Аояма 9 даваа, 1 унаатайгаар удаалж буй. Түүний араас озэки Такаяасү нарын бөхчүүд 8 даваатай удаалж байна. Харин аварга Харүмафүжи Д.Бямбадорж өнөөдрийн барилдаанд ялалт авсан ч тэргүүлэгчдийн дөрөвдүгээр эгнээнд бичигдсэн хэвээр явна.

Хакүхо өчигдөр 1045 дахь даваагаа авч сүмогийн домогт их аварга Чёнофүжигийн түүхэн амжилтыг давсан билээ. Тэгвэл одоо түүний өмнө Кайогийн 1048 гэсэн даваа байна. Энэхүү амжилтыг Кайо 1988-2011, Чиёнофүжи 1970-1991 оны хооронд дээрх амжилтыг үзүүлж байжээ. Тэгвэл энэ цагийн их аварга Хакүхо энэхүү амжилтыг долдугаар сарын тэмцээнд үзүүлэх боломжтой юм.

Мэргэжлийн сүмо бөхийн түүхэн дэх хамгийн олон даваа авсан бөхчүүдийн гуравт бичигдэж байсан Хакүхо нэг байр ахиулж, улмаар давааг ахиулах боломжтой боллоо.

Хакүхо 2016 оны арваннэгдүгээр сарын барилдаанд 1000 давааны босгыг давжээ. Улмаар оны төгсгөлийг 1008 даваатайгаар өндөрлүүлсэн. Үүний дараа тэрбээр хэвлэлийнхэнд өгсөн ярилцлагандаа ингэж хэлж байсан юм. Хакүхо “Би 2017 онд 40 даваа авах зорилготой. Хүчит озэки Кайо 1047 давааг авсан. Тиймээс надад улам сайн хичээх үе ирлээ. Бас дахин нэг амжилтын төлөө тэмүүлэх болно. Би хамгийн багадаа хоёр башёд түрүүлэх ёстой” гэж өнгөрсөн онп хэлж байв.

Тэгвэл тэрбээр энэ оны долдугаар сарын башёд энэхүү амжилтыг үзүүлэх боломжтой боллоо. Одоо Нагоя башё өндөрлөхөд таван барилдаан үлдсэн. Хакүхогийн хувьд ганцаараа 10 даваатай тэргүүлж байгаа бөгөөд аварга Кисэносато, Тэрүнофүжи Г.Ган-Эрдэнэ нар башёг дундаас орхисон юм.