АНУ-ын ерөнхийлөгч Дональд Трамп Твиттерт идэвхтэй нэгэн. Тэрбээр хууль ёсны дүрэм, журмаас гадна хувийнхаа үзэл бодлыг сошиалд чөлөөтэй илэрхийлсээр ирсэн.

Харин их гүрний төрийн тэргүүний хувиар Трамп нэгдүгээр сарын 20-нд тангараг өргөснөөс хойш нийт 920 удаа жиргэжээ. Твиттерт дэндүү идэвхтэй байдгаа тэрбээр “орчин цагийн ерөнхийлөгчийн үйлдэл” гэж тодорхойлсон.

Ерөнхийлөгчийн твиттер зуршлын талаар Business Insider анализ хийжээ. Тухайлбал, Трамп өглөөний 7-8.00 цагийн хооронд жиргэх дуртай, бас хамгийн дуртай сэдэв нь “хэвлэл мэдээлэл”. Мөн “Fake news”, сонгуулийн үйл явцад Орос хөндлөнгөөс оролцсон гэх дуулиан гээд түүний жиргээний сэдэв өргөн хүрээг хамардаг.

АНУ-ын ерөнхийлөгчөөр ажилласан таван сар хагасын хугацаанд Трамп юуны тухай, хэзээ, хэрхэн жиргэв?

• 2017.01.20-нд тангараг өргөснөөс хойш долдугаар сарын 7 хүртэлх хугацаанд Трамп 920 удаа жиргэжээ. Өдөрт 5.4 жиргээ.

• Энэ хугацаанд хоёр өдөр л жиргээгүй өнгөрсөн. Дөрөвдүгээр сарын 15, зургадугаар сарын 8. Хамгийн ихдээ зургадугаар сарын 22-нд 16 удаа жиргэжээ.

• Өглөө твиттертээ жиргэснээр ерөнхийлөгчийн ажлын өдөр эхэлдэг. Өнгөрсөн хугацаанд тэрбээр өглөө 7-8.00 цагийн хооронд хамгийн олон буюу 130 удаа жиргэжээ. Нийт жиргээний 41 хувь нь өглөө 5-9.00 цагийн хооронд бичигдсэн байна. Шөнийн 03.00 цагт л жиргэсэн тохиолдол байхгүй. Хоногийн бусад бүх цагт бичигдсэн жиргээ түүний Твиттер архивт хадгалагджээ.

• Амралтын өдрөөс илүү ажлын өдрүүдээр их жиргэдэг. Тодруулбал, даваа гаригт 144, мягмар-136, лхагва-127, пүрэв-143, баасан-157, бямба-105, ням-108 байна.

• Хэвлэл мэдээллийн тухай тэрбээр 113 удаа жиргэсэн. Тэдний 57-д нь ‘fake news’ гэх үг орсон байв.

• Түүний жиргэх дуртай бас нэг сэдэв нь Оросын хакер ажиллагаатай холбоотой мөрдөн байцаалт. Энэ талаар тэр нийт 99 удаа жиргэжээ.

• Тэрбээр мөн эдийн засаг, ажилгүйдэл, худалдааны талаар жиргэх дуртай. Эдгээр асуудалтай холбоотой 98 жиргээ бий.

• Сонгуулийн кампанийн үеэс л олны анхаарал татаж байсан цагаачлалын асуудлаар Трамп 74 удаа жиргэжээ. Үүнд Мексикийн хилийн дагуу хана босгох, исламын шүтлэгт орны иргэдийг АНУ-д нэвтрүүлэхгүй байх тухай хориг ч бас багтана.

• Трампын жиргээний сэдвүүдийг ангилбал, хэвлэл мэдээлэл-113, Орос-99, эдийн засаг/худалдаа-98, гадаад зочдын айлчлал-83, цагаачлал-74.

С.ЦЭЛМЭГ