БНСУ-ын Чунчон хотноо таеквондогийн Дэлхийн аварга шалгаруулах тэмцээн өнгөрөгч долоо хоногт болж өндөрлөсөн. Тус тэмцээнд манай улсаас “Рио 2016” олимпийн наадамд амжилттай оролцсон П. Тэмүүжин нарын тамирчид шигшээ багийн дасгалуулагч Хо Ин Ёны удирдлагад амжилттай оролцсон юм. Тэгвэл баг тамирчид өчигдрөөс эхэлсэн “Korea Open” нээлттэй тэмцээнд оролцож байна. Тус тэмцээний эрэгтэйчүүдийн 58 кг-ын жинд өрсөлдсөн М.Түмэнбаяр аваргын алтан медалийг хүртэж, Монголын таеквондогийн спортын түүхэнд нэгэн шинэ амжилтыг бичлээ. Түүний энэхүү амжилт насанд хүрэгчдийн олон улсын томоохон тэмцээнээс авч буй анхны алтан медаль юм.

М.Түмэнбаярын жинд нийт 59 тамирчин өрсөлдсөн бөгөөд Их Британи, Энэхтхэг, Вьетнам, ОХУ, Казахстан, Колумб, Япон, Тайвань, БНСУ-ын шилдэг тамирчид багтжээ. Манай тамирчин эхний тойрогт хийлж, улмаар БНСУ-ын гурван тамирчинг дараалан ялж, шигшээд шалгарсан. Тэрбээр аваргын алтан медалийн төлөө нөгөө хэсгийг тэргүүлэн тоглож, учраа бүрээ буулган авсан Японы шилдэг тамирчин Сүзүки Сергиог хожсон юм.

М.Түмэнбаяр өмнө нь 2014 онд БНСУ-ын Инчонд болсон Азийн наадмаас хүрэл медаль хүртэж, Монголын таеквондогийн тамирчдын медалийн буухиаг эхлүүлж байсан бол энэ удаа алтан медалиар үргэлжлүүлэв. Түүнчлэн манай шилдэг тамирчин П.Тэмүүжин олимпийн наадамд оролцсон анхны тамирчин болсон төдийгүй дэлхийн аваргын хүрэл медальт Мексикийн тамирчин Саул Гутьрессийг хожин, шөвгийн наймд ‘Лондон 2012’ олимпийн наадмын аварга, ДАШТ-ий хоёр алт, нэг мөнгөн медальт Испанийн тамирчин Г.Бониллад дийлдсэн түүхтэй.

Энд Монголын таеквондогийн тамирчдын амжилт БНСУ-ын дасгалжуулагч багш Хо Ин Ёнтой салашгүй холбоотой гэдгийг тэмдэглэх нь зүйтэй. Өдгөө шигшээ багийн дасгалжуулагчаар ажиллаж байгаа тэрбээр 2012 оноос эхлэн манай улсад ажиллаж байгаа юм.

Ч.БОЛОР