“Магадгүй би хэзээ ч гэрлэхгүй” байх хэмээн хэвлэлд маш зоригтой ярилцлага өгч байсан жүжигчин, хөтлөгч Т.Өөдөө удахгүй үрийн зулай үнэрлэхээр яаран байна. Хэдэн жилийн өмнөөс “Desoft” студийн захирал Эрхэмээтэй хамтран амьдрах болсон хөтлөгч бүсгүй хөдөлмөрч гэдгээ харуулж одоо хэр бие давхар мөртөө л C1 телевизээр цацдаг нэвтрүүлгүүдээ хөтөлсөөр байгаа нь найзуудаасаа зэмлэл хүртэхэд хүргэжээ. Угийн хөдөлмөрч, дайчин Т.Өөдөө аргагүйн эрхэнд эмчийн хяналтаас гарах аргагүй болж, сая нэг ажлаасаа хөндийрсөн сурагтай. 

Нэг хэсэг жүжигчин Ч.Ундралтай хамтран рок попын “гал тогоо”-гоор ороод гарсан Т.Өөдөө шаггүй жүжигчин болохоо харуулж уран сайхны кино, драмын жүжиг гээд овоо хэдэн бүтээлд өөрийн дүрээ үлдээгээд амжсан. Гэхдээ явж явж Өөдөөгийн хамгийн зөв сонголт нь хөгжмийн нэвтрүүлгийн хөтлөгч байсан гэж олон хүн ярьдаг юм билээ. Түүний анхны хайрын эзэн жүдо бөхийн тамирчин залуу байсныг урлаг, спортын хүрээний цөөн тооны хүмүүс мэднэ. Тэдний анхны хайр бүтэлгүйтэж, тамирчин залуу нь алсын Америкт олон жилийг өнгөрүүлсэн ч эргэж ирээд бас л Өөдөөтэй амьдрахыг хүсч, гэрлэх санал хүртэл тавьсан гэдэг. Гэвч анхнаасаа л бүтээгүй тэдний дурлалын романст цэг тавигдаж, өдгөө өөр өөрийн шинэ амьдралыг сонгоод байна.

Хөгжилтэй, хөөрхөн, цоглог…Хөгжмийн нэвтрүүлгийн авьяаслаг хөтлөгч Өөдөөд аз жаргал хүсье.