Ахмад настны нийгмийн хамгааллын тухай хуульд нэмэлт өөрчлөлт оруулж “Насны хишиг” олгодог болсон билээ. Энэ дагуу Цагаан сар, Үндэсний их баяр наадмын өмнө олгож байхаар болсон юм. Тэгвэл “Насны хишиг”-ийг Төрийн банк өчигдрөөс эхлэн олгож эхэлжээ.
Ерөнхийлөгчийн сонгуулийн өмнө дээрх мөнгийг өгч байна гэх хардлагыг иргэдэд төрүүлж бай мэдэх юм. Учир нь өмнө нь УИХ-ын сонгуулийн үеэр Тавантолгойн 1072 ширхэг хувьцааны мөнгө иргэдийн дансанд орж байсан.
Сануулахад “Насны хишиг”-ийг 65 ба түүнээс дээш настай ахмадууд авдаг ба хоёрдугаар сард 51500 ахмад настанд 4 тэрбум 200 сая төгрөгийн тэтгэмж олгосон байна. Цагаан сараар насны хязгаарт хараахан хүрээгүй байсан ч одоо нөхцөлүүдийг хангасан бол харьяа газрынхаа халамжийн мэргэжилтэнд хандах боломжтой аж. Харин долдугаар сарын 11-нээс хойш төрсөн ахмадууд энэ жилийн хувьд уг хишгийг авах боломжгүй юм байна.
Насны хишиг олгохдоо:
- 65-69 настай ахмадад 50 мянган төгрөг
- 70-79 настай ахмадад 80 мянган төгрөг
- 80-89 настай ахмадад 150 мянган төгрөг
- 90 ба түүнээс дээш настай ахмадад 250 мянган төгрөг олгож байна.
Т.НОМИН