Хятад улс БНАСАУ-аас авч буй ажиллах хүчний квотоо багасгав. Энэ нь Пхеньянд үзүүлж буй хүчтэй хориг арга хэмжээ байх болно гэж Япон болон АНУ үзэж байгаагаа илэрхийлжээ. Хойд Солонгосын ажиллах хүчний квотыг багасгасан нь тус улсад орох гадаад валютын урсгалын үндсэн сувгийг хааж буйн хэрэг гэж үзэж тэд байгаа юм.

Өмнөд Солонгосын мэдээллээр Хятадад 90 мянган Хойд солонгосчууд ажилладаг бөгөөд 100 сая ам.доллар шилжүүлдэг гэв.

2016 оны гуравдугаар сард НҮБ-ын Аюулгүй Байдлын Зөвлөл Хойд Солонгосын цөмийн дөрөв дэх туршилттай холбоотойгоор ээлжит тогтоол гаргасан байдаг.  Үүнтэй холбоотойгоор Хятадын Засгийн газар хэд хэдэн компаниудад хойд солонгосоос ажиллах хүчин авахгүй байхыг үүрэг болгов. Улмаар Хятад Хойд Солонгосын хил орчмын Зилинь болон Ляонин хотын аж ахуйн нэгжүүд Хойдуудыг ажилд авахаа больжээ. Үүнээс гадна, сүүлийн үед Хятад Хойд Солонгос руу газрын тос болон тосон бүтээгдэхүүний түүхий эдийг маш бага хэмжээтэй экспортлож байна гэж Японы Yomiuri сонин мэдээлж байна. Үүний улмаас БНАСАУ-д тавдугаар сард шатахууны үнэ гурав дахин нэмэгдэв.

Шинжээчдийн үзэж байгаагаар Япон болон АНУ Хойд Солонгосыг цөмийн болон пуужингийн хөтөлбөрөөс татгалзахыг шаардаж, тус улсад дарамт үзүүлэх боломж нь барагдаж байна. Иймээс тэд Бээжинд шахалт үзүүлэн Хойд Солонгосын эсрэг арга хэмжээ авахыг удаа дараа шаардаж байгаа юм. Үүнтэй холбоотойгоор, Бээжин Пхеньянаас нүүрс импорлохоо зогсоожээ. 2016 оны байдлаар Пхеньян нүүрсний экспортоос нэг тэрбум ам.долларын орлого олдог байв. Энэ оны гуравдугаар сард Пхеньяны нүүрсний экспорт нь 99 хувиар буурсан үзүүлэлт гарсан байна.

2016 оны есдүгээр сарын 9-ний өдөр Хойдууд ээлжит цөмийн туршилт хийснээс хойш НҮБ-ын Аюулгүйн Зөвлөл өнгөрсөн 11-р сард БНАСАУ-аас жилдээ 400 сая ам.доллартай тэнцэх хэмжээний эсвэл 7.5 сая тонн нүүрс импортлохыг хориглосон ажээ.

Бэлтгэсэн: Ц.УРАН