Олон улсын Йогийн өдрийг угтан өнөөдөр “Йог-Эв нэгдэл, Энхтайван” уриан дор гурав дахь жилдээ тэмдэглэж байна. Д.Сүхбаатарын талбай дээр болсон арга хэмжээг Монгол Улсад суугаа Энэтхэг Улсын Элчин сайд болон Улаанбаатар хотын захирагчийн алба болон Йогийн төвүүдтэй хамтран зохион байгууллаа. Йогийн арга хэмжээ өглөөний 08.00-11.00 цагийн хооронд болж, йогоор хичээллэгсэд болон йог сонирхогчид Д.Сүхбаатарын талбай дээр цугларсан юм. Манай улсад сүүлийн жилүүдэд йогоор хичээллэгсдийн тоо нэмэгдэж, тэр хэрээр йог-бясалгалын төвүүд нэмэгдсээр байна. Өнөөдрийн арга хэмжээний үеэр ‘Мандала Йог’, ‘Чимээ аниргүйн өргөө’ зэрэг төвүүд иргэдийн йогийн талаарх мэдээллийг өгч байв.

Йог нь эртний Энэтхэгээс үүсэлтэй бөгөөд өдгөө дэлхийн дахинаа өргөн дэлгэрч буй. 2014 онд анх Йогийн өдөртэй болох санаачилгыг НҮБ-д дэвшүүлжээ. Энэхүү хүсэлтийг дэлхийн 177 орон хүлээн зөвшөөрсний дагуу НҮБ-аас жил бүрийн зургадугаар сарын 21-ний өдрийг Йогийн өдөр болгон 2015 оноос тэмдэглэн иржээ. Энэ жил 21-ний өдөр ажлын өдөр таарч байгаа учраас амралтын өдөр буюу өнөөдөр Йогийн өдрийг Д.Сүхбаатарын талбайд тэмдэглэжээ.

“Йог гэдэг бол шашин биш. Йог бол сайн сайхан аж амьдрахуйн шинжлэх ухаан, бие болон сэтгэлийн зохицол юм. Йогоор хичээллэж байгаа иргэд болон йог судлаачид хүний бие бялдар, оюун ухаанд үзүүлэх эерэг нөлөөний тухай маш олон жагсаалт гаргасан байдаг. Ер нь йогийн талаар олон зүйл нэмж тайлбарлах шаардлагагүй. Ялангуяа йогоор хичээллэж байгаа хүмүүс йогийн ач холбогдлыг биеэрээ мэдэрсэн байдаг.” гэж Энэтхэгийн Элчин сайд Т.Суреш Бабу хэлсэн юм.

“Йог-Эв нэгдэл, Энхтайван” уриан дор гурав дахь жилдээ тэмдэглэж буй йогийн өдрийг орон нутагт тэмдэглэн өнгөрүүлж байна. Тодруулбал, Дархан, Эрдэнэт зэрэг хотуудад йогчид өглөөний дасгал, бясалгал хийжээ.

Одоогоор манай улсад йог-бясалгалын 30 гаруй төв байдаг байна.

Орхон аймгийн йогчид.

Орхон аймгийн йогчид.