Улаанбаатар 2017/06/16: Их Британи Умард Ирландын Нэгдсэн Вант Улс энэ жил Хатан хаан II Элизабетийн 91 насны ойг тэмдэглэж байна. Тэрбээр 1952 онд хаан ширээг залгамжилсан ба Британийн болоод дэлхийн түүхэн дэх хамгийн урт хугацаанд хаан ширээнд сууж буй Хатан хаан юм.

Улаанбаатар дахь Британийн Элчин Сайдын Яам 6-р сарын 15-д Хатан Хааны төрсөн өдрийг төр,нийгмийн зүтгэлтнүүд, бизнесийн салбарынхан, Британид төгсөгчид болон хэвлэл мэдээллийн төлөөлөгчидтэй тэмдэглэлээ.

Энэ үеэр Британийн алдарт инноваци, технологи, боловсрол болон соёлыг онцлон тэмдэглэсэн ба тус баярын хүлээн авалтыг Портмейрон, Рэнж Ровэр, Холидэй Инн зэрэг Британийн компаниуд ивээн тэтгэжээ. Төрсөн өдрийн бялууг Элчин сайд, Катрин Арнолд, УИХ-н гишүүн С.Батболд болон  what3words хаягжуулалтын систем ашиглан Британийн Гадаад Хэргийн Яамны Төрийн нарын бичгийн даргаас урилга хүлээн авсан Цэсэндолгор гуай нар зүслээ.

Элчин сайд Катрин Арнолд хэлэхдээ ‘’Та бүхнийг хүрэлцэн ирж Хатан Хааны төрсөн өдрийг тэмдэглэж буйд баяртай байна. Төрсөн өдөр бол онцлох мөч юм. Британи-Монголын харилцаанд өнгөрсөн жил онцлон тэмдэглэх олон үйл явдал боллоо. Поло тэмцээн, зэрлэг ан амьтдын хулгайн ан болон худалдаалахтай тэмцэх, экспортын стандартыг сайжруулах, сэтгэцийн эрүүл мэндийг дэмжих ажлууд зэрэг Британи, Монгол улсуудад төдийгүй дэлхийд чухал хамааралтай олон зүйлс дээр хамтран ажиллаж байна” гэв.