Венесуэлийн засгийн газар Колумбын үзэл суртлыг өөгшүүлсэн телевизийн олон ангит киног нэвтрүүлэхээ зогсоохыг киног дамжуулж байгаа Телевен телевизид мэдэгджээ. Уг кинонд жүжигчин Chepe Fortuna Колумбын дүрийг, түүний эгч Венесуэлийн дүрийг бүтээсэн бөгөөд Венесуэль бяцхан Уго гэдэг нохойтой ажээ. Киноны нэгэн үзэгдэлд Венесуэль бяцхан Уго нохойгоо алддаг бөгөөд Колумба Венесуэльд нохойгүй болсон нь тустай хэрэг хэмээн хэлдэг байна.

Харин Уго нохойны нэр Венесуэлийн удирдагч Уго Чавезын нэрээр нэрлэгдсэнд Венесуэлийн зүгээс улсыг нь гутаан доромжиллоо хэмээн үзэж, даруйхан уг савангийн дуурийг олон нийтэд нэвтрүүлэхээ зогсоо хэмээн шаардсан байна. Түүнчлэн иймэрхүү үзэл сурталжсан зүйлс нь харилцаагаа сайжруулахаар ажиллаж байгаа хоёр орны хичээл зүтгэлийг талаар болгож байна хэмээн шүүмжилжээ. Колумба болон Венесуэль улс 2010 оны наймдугаар сард дипломат харилцаагаа сэргээсэн юм.

Б. Энхцэцэг