Улс төрд шар тайлах арга

Хуучирсан мэдээ: 2011.01.14-нд нийтлэгдсэн

Улс төрд шар тайлах арга


Хамтарсан Засгийн газрыг заавал огцруулахыг хүсэгчид олон байна. Чаддаггүй л болохоос энэ бол ямар ч үед байдаг л хүсэл тэчьяал.   Гэхдээ зарим нь бас чаддаг л юм.   Сүүлийн  хоёр жилийн турш тархай бутархай, туурга тусгаар байж улс төрд байн байн агсам тавьж байсан  бүлэглэл, хувь хүмүүс одоо нэгдэж байна.  Агсам тавьж байсан архи нь гарчихсан.  Харин одоо шараа тайлах хэрэгтэй.  Энэ бол маэстро нь ажлаа сайн хийж байгаагийн баталгаа.  Үнэхээр сайн байна.  Өөр юу хэлэх вэ.   Харин  тэд зөвхөн өс хонзон гэсэн  нэгэн  цэгт уулзаж  буйг мартаж болохгүй.   Энэ бол өс хонзон + өс хонзон=өс хонзон   гэсэн хөнгөхөөн бодлого.  Гэхдээ энгийн атлаа бас адармаатай. Нэмэгдэхүүний нэг нь мэдэгдэхгүй байгаа. Тэгэхээр  тэгшитгэл болж таарах нь.  Тэгшитгэлийг бодож чаддаг байхын тулд ядаж үржүүлэхийн хүрд цээжлэх шаардлагатай. Тэгж гэмээнэ  үл мэдэгдэх нэмэгдэхүүнийг олж улмаар тэгшитгэлийг зохиосон хүнийг таньж таарна. Тэгэхээр хамтдаа бодож үзье.

ӨС- 1 БУЮУ “ЯБЛОКО” Ц.БАТБАЯР  

“Аанхаа” нэвтрүүлгээр “Яб­локо гэж юуг хэлдэг вэ” гэхэд “УИХ-ын гишүүн Ц.Батбаярыг хэлнэ” гэж хариулсан онигоо бий.  Ганцхан өдрийн дотор  Багахангайн  даргаас улсын нийслэлийн захирагч болтлоо цойлсон  “Яблоко” Батбаярыг өдгөө бараг бүх сонин зүхэж байх шиг байна. Аргагүй ээ. Ардын намыг сөрж дуугарсан түүнийг сөхөрч унагахын төлөө амтай болгон арзганаж байгаа нь үнэн. Гэтэл энэ хөөрхий хөдөөний эр яагаад гэнэт том улс төр рүү нулимах болов гэдэг үнэхээр сонирхолтой. Тэр тийм зоригтой хүн үү. Эсвэл шударга юм уу. Бүр тэнэг ч юм уу.  Улаанбаатар хотын Засаг даргаас огцорч байхдаа  намаа Захиргааны хэргийн шүүхэд өгч хэсэгтээ  хэвлэлийн нүүр тахлаж билээ. Тухайн үед мань яблоког С.Баярыг багалзуурдах гэсэн   М.Энхболдын гар гэж таамаг дэвшүүлж байсан юм. Үнэн худлыг нь бид мэдэх биш. Ямартаа ч тэгж бичигдэж байсан санагдана.  Харин одоо  тэр хэний  түлхсэн шатрын хүү вэ.  Хурууныхаа өндгөөр араас нь хатгачихаад жуумалзаж суугаа эрхэм хэн юм бол. Энэ асуултын хариуг  хайхаас  ч айх хүн олон. Учир нь энэ тэрийг бодолгүй  дүгнэхэд М.Энхболд гэсэн хариу шууд гарна.  “С.Батболдыг тууштай дэмжигч гэх өргөмжлөл хүлээсэн хүн арай ч тэгэхгүй байлгүй”  гэсэн эргэлзээ МАН дотор манан мэт суунаглаж байна.  М.Энхболд биш юм  бол хэн юм бэ. Үүнд зарим нь хариу өгч эхэллээ. Архангайхан гэж. Ард нь Архангайн Н.Энхбаяр үзэгдэх төдий сүүмэлзэнэ. Нарийн үзвэл Ц.Батбаяр ч  эх талаасаа элэг нь Архангайнх гэнэ. Гэхдээ энэ бол бас л таамаг төдий. Харин тэр  яагаад Д.Зоригтыг огцруулах  хүсэлт гаргасан бэ. Энэ л  барьж авах сэдэв. Юун түрүүнд Ц.Батбаярын үед тогтоосон түүний бизнесийн хаанчлалыг  Д.Зоригт мулт цохиод хаячихжээ. Бизнесийн хаанчлал гэхээр сүржин санагдаж байж магадгүй. Гэхдээ Нийслэлийн Засаг дарга байсан хүн өөрийнхөө  дэмждэг (дэмждэг гэж ихэд зөөлрүүлэв) ганц нэг компанид давуу эрх олгочихоод  тэрүүхэндээ хөөрхөн амь зуугаад байж. Ялангуяа хотын утаа, утаагүй түлш, нийслэлийн газар, замтай холбоотой мэр сэр тендерүүд.  Чамлахаар чанга атгадаг л бизнес. Гэтэл Д.Зоригт түүнийг нь будаа болгочихов.  Яблокогийн  уур хүрнэ биз дээ. “Энэ муу намайг хэн гэж бодоов.  Би чинь Хотын захирагч байсан  хүн. Намайг хотын бүлэгт байдгийг мэддэггүй юм байх даа…” гэх зэргээр  шаралхсан, эхэндээ. Гэтэл нэг муу бацааныг оролдох гэсэн биш бүр эцэстээ намдаа тэрсэлсэн болж таарав.

 Алийгаа мэдэхгүй чинэрч явтал нь С.Эрдэнэ, Ц.Сэдваанчиг хэмээх хоёр нөхөр гарч ирээд нөгөө жаахан зүйлийг нь дэлхийн чинээтэй томруулж орхилоо. Одоо яая гэхэв. Ерөнхий сайд болон   Шадар сайдын өрөөний үүдэнд хадаатай юм шиг улалзаж улмаар У.Хүрэлсүх даргынхаа жаданд сүлбүүлчихгүй өнгөрвөл зол. Нийтийн өмнө  томорч томорч баахан мэдэгдэл хийчихсэн байдаг. “Ах аа, байя аа” гэлтэй биш үзээд өнгөрөхөөс өөр яана.  УИХ-ын 2008 оны сонгуулиар Баянзүрх дүүрэгт нэр дэвшихдээ Ч.Сайханбилэгийг оргүй гүтгэж тэр нь баригдаж явсаныг бодоход  хорон санаа нь хоолойдоо тулсан эр гэдэг нь ойлгогддог.   Одоо бол тэр Д.Зоригтыг яадаг ч байсан огцруулна гэсэн амлалтдаа эзэн болохоор зүтгэж байгаа. Энэ зүтгэлийг нь Засгийн газартай тооцоо хийх зорилго бүхий бүлэглэл ивээлдээ авсан.  Хамгийн сонирхолтой нь одоо түүний “өмгөөлөгч”-өөр тодроод байгаа УИХ-ын гишүүн Э.Мөнх-Очир түүнийг хотын даргаас огцруулах  төлөвлөгөөг гардан хэрэгжүүлж байсныг яаж мартана гэж…  

ӨС-2 БУЮУ С.ЭРДЭНЭ, З.ЭНХБОЛД

Хачин юм шүү. С.Эрдэнэ, З.Энхболд хоёрыг эвсэж намынхаа эсрэг зүтгэхэд эхэндээ нэг их гайхаагүй юм.  “Аан, Ц.Элбэгдоржийг Ерөнхийлөгчийн сонгуульд өрсөлдөхөд  олигтой хөдлөж өгөөгүй Н.Алтанхуягтай тооцоо бодох нь ” гэж ихэнхи нь бодов. Зарим нь “Аргагүй шүү дээ. Эрдэнээг “Ганцхудаг”-т байхад нь Алтанхуяг үл тоосон биз дээ” гэсэн бол  партизанууд нь “Намаа Алтангадасаас салгах нь нь зөв өө. З.Энхболд ч намын дарга болох хүний нэг мөн л дөө” гэлцэж байлаа.  Гэвч таамаглалууд зөрлөө.   Эхэндээ тэдний байгуулсан Зүүний хүчний холбоо ард түмнийхээ амьдралыг сайжруулна хэмээн популизмын симфони  эгшиглүүлэв. Гэвч тэр аянд манарах хэн байхав дээ. Төдөлгүй Н.Алтанхуягаа зуурч үзэв. Тусыг эс олов.  Аль нэг даргыг огцруулъя гэсэн зоргоор дагаж дэрвэдэг наснаасаа холдсон байжээ, партизанууд нь. Уг нь маэстро нь Ардчилсан намын даргыг огцруулах замаар хамтарсан Засгийн газрыг тарааж  болно гэж   сэтгэж байсан юм. Тэр нь ч зөв байсан. Гэтэл Ардчилсан намынхан С.Эрдэнэ, З.Энхболд нарын үгээр хөдөлсөнгүй. Ардчилсан намынхан ч юу байхав, “Женко” хөдөлж өгсөнгүй. Бас Ц.Элбэгдорж зөвшөөрсөнгүй.  Ингээд Н.Алтанхуягаар  дамжиж С.Батболдыг намнах төлөвлөгөө  амжилт олсонгүй.  Аргаа барсан хоёр “Женко”-той дайтахаасаа айлаа.  “Женко”-той тулалдахын тулд тэд эхлээд шонхор болох ёстой. Иймэрхүү их гарын тулалдаанд зөвхөн шонхорууд нисдэг тул мань хоёрын бяр дутав.   Одоо яах вэ. Мэдээж энэ гацаан дундаас  гарах аргыг өнөөх удирдаач нь зааж өглөө. “Хөөе, Яблоко дээр яваад очооч”  Нээрээ тийм шүү дээ.  “Тоосго сугалах” гэдэг хэлц байдаг байх аа.  М.Энхболдын Засгийн газрыг унагаахын тулд сайдуудыг нь нэг нэгээр нь  суга татан огцруулж байсан бус уу. Ингээд Ц.Батбаярт хүч нэмэв. “ Эх оронч төрийн түшээ”-гээр өргөмжлөгдсөн улс чинь  “Эх орныхоо төлөө”зүтгээд байхаас яахав.  Зөвхөн тэр өргөмжлөлийг авсан гишүүдийг  тоолоод үзэхэд УИХ дотор бүлэг болох хэмжээний эх орончид байхад юунаас айна гэж. Тэгээд ч хамтарсан Засгийн газрыг огцруулах эрх ашиг нэгдэж байна, цаана нь. Өс нийлнэ гэж чухам үүнийг хэлдэг юм чинь.  За ингээд цаашаа явж өгнө дөө.

ӨС -3 БУЮУ  Ц.ШИНЭБАЯР  

Нүүрс харахаараа инээд нь хүрдэг энэ эрхэм одоо ёстой  star гэдэг боллоо.  Монгол ардын хувьсгалт нам гэдэг нэрэндээ үнэнч, цусан улаан хувьсгалд дуртай юм байж гэж бодсон чинь бас үгүй юм аа. Зүгээр л МАХН гэдэг товчлолд нь л шунан дурлаж байж.  Хөөрхий гүрийсээр байгаад МАХН гэдэг товчлолтой Монголын алдартай хувьсгалт нам гэдэг нэрийг өмчилж авлаа.  Зүтгэлийг нь үнэлэх хэрэгтэй.   МАН-ынхан түүнээс өрсөж очоод энэ дөрвөн үсэг орсон 90 нэрийг хувааж авсан ч Ц.Шинэбаярын хувилбарыг гээчихжээ.  Хэдэн залуусаа явуулаад хэд хэдээр нь авсаныг одоо хэвлэлийнхэн шүүмжлэх аястай. Яадгийм, авч л байг. Л.Оюун-Эрдэнэ хувьдаа гурван намтай байна уу, 30 намтай байна уу түүний л асуудал.   Ямар авгай аваад байгаа биш, намын нэр авч байхад сүржин гэдэг нь.   Тэглээ гээд яавал гэж. Харин  одоо Шинэбаярын дугуйлж буй гэрт хэн хэн орж суух нь л сонин байна. Нөгөө хүнсний ногооны нэртэй нөхөр, намынхаа даргыг хусах гэсэн тэмцэгчид арай ч элсчихгүй биз. Харин тэрний наана хамтарсан Засгийн газрыг огцруулах өс хонзон дээр нэгдэж байвал барав.  Удирдаач зөвхөн үүнийг л хүсч байгаа. Д.Зоригтоор  дөрөөлж “тоосго сугалах” мэхийг  хэрэгжүүлэхийн төлөө тэд улайрч таарна. Эхний удаа аваад үлдэхэд хоёр дахь  удаагаа дахиад л огцруулах хүсэлт тавина. Дахиад л  авч үлдэнэ. Тэгээд цаашаа хэдэн удаа гэдгийг зөвхөн маэстро л мэднэ.  Харин энэ үйлдэл давтагдах тусам хамтарсан Засгийн газар, УИХ, бүр цаашилбал Ардын нам өөрөө сульдаж таарна. Энэ л жинхэнэ улс төрийн  шар тайлах арга юм шүү дээ.

Л.Мөнхбаясгалан

Эх сурвалж:

NewsMN Гар утасны хувилбар Татах
NEWS.mn

Мэдээллийн эх сурвалж