Монголын волейболын холбооны Үндэсний лигийн аварга шалгаруулах 16 дахь удаагийн шийдвэрлэх тоглолтууд өнөөдөр болох гэж байна. Энэ сарын 12-ноос эхэлсэн шигшээ тоглолтод эрэгтэй, эмэгтэй төрөлд аваргын алтан медаль болон хүрэл медалийн төлөө өрсөлдөж буй багууд бүгд хоёр хожилтой болсон учир өнөөдөр өрсөлдөгчөө буулган авбал энэ жилийн лигийн тэмцээний медалийн эзэд тодрох юм.

Өнгөрсөн жилийн аварга “Энагура”-гийн охид өчигдөр “Эрчим” багийг 3:2 харьцаатай хожсоноор хоёр дахь хожлоо авсан бол эрэгтэйчүүдийн төрөлд аваргын төлөө өрсөлдөж буй “Буянт-Ухаа” болон “Эрчим” багуудын тоглолт 3:1 харьцаатай ИНЕГ-ын багийн ялалтаар өндөрлөснөөр тэд хоёр дахь ялалтаа авчээ. Харин хүрэл медалийн төлөө тоглож буй “Уурхайчин” багийн эмэгтэйчүүд өчигдөр 3:0-ээр “Тэнүүн огоо”-г, эрэгтэйчүүдийн төрөлд “Ноён” баг мөн 3:0 харьцаатай “Уурхайчин”-г хожсоноор хоёр дахь ялалтаа авчээ.

Волейболын үндэсний лигийн аварга шалгаруулах тэмцээний шигшээ тоглолтууд өнөөдөр 14.00 цагаас Спортын төв ордонд эхэлнэ.

С.Цэлмэг