Үйлдвэрлэл, борлуулалт, чансаагаараа дэлхийд гуравдугаарт бичигддэг нүдний шил үйлдвэрлэгч Marchon компани загвар хөөх дуртай залууст зориулан 3D кино үзэхдээ хэрэглэх загварлаг нүдний шил үйлдвэрлэжээ. Лас Вегас хотноо болсон CES шоуны үеэр тус компани 3D шилнийхээ коллекцийг албан ёсоор танилцуулсан байна. Шинэ бүтээгдэхүүнийхээ талаар Marchon компанийн тэргүүн Cristin Lyons “Нүүрэндээ тавьж, хэрэглэж буй бүрэн тансаг, загварлах байх ёстой. Манай шил бол шинэ технологийг загвартай хослуулсан бүтээл. Үнэнийг хэлэхэд, гадуур худалдаалагдаж байгаа 3D шилнүүд бүгд загвар муутай байдаг шүү дээ” хэмээн ярьжээ.

Marchon-ы 3D шилнүүд нь өдгөө дэлхийн нийт кино театруудын 85 хувьд нь ашигладаг RealD технологийг дэмжиж ажиллах аж. Түүнчлэн нүдний хараанд хортой нарны хэт ягаан туяаг 100 хувь шүүх бөгөөд ихэнх загварууд нь саарал туяатай линзтэй юм байна. Ирэх сараас дэлхийн зах зээлд нэвтрэх Marchon-ы 3D шилний энгийн загварууд нь 30 ам.доллар, илүү ганган чамин хийцтэй загвар нь 150 ам.долларын үнэтэй байх ажээ. Marchon компани Calvin Klein, Coach, Disney, Karl Lagerfeld, Lacoste зэрэг дэлхийд танигдсан брэндүүдтэй хамтран ажилладаг бөгөөд 3D шилний коллекцид эрэгтэй, эмэгтэй загвараас гадна хүүхдэд зориулсан шилнүүд ч байгаа гэнэ.

С.Цэлмэг