Баянхонгор аймгийн Хөгжимт драмын театр шинэ оны уран бүтээлээ “Зүрхнээс эгшиглэх аялгуу, Зүүдэнд бүжих хунгийн даль” цэнгүүүнээр нээлээ. Театрын бүжиг дэглээч, бүжгийн багш МУСТА Ц.Алтанцэцэг, хөгжмийн багш удирдаач МУСТА Б.Батжаргал нарын уран бүтээлийн хамтарсан тоглолт тус театрын энэ оны анхны уран бүтээл болж байна. Хамтарсан уран бүтээлийн цэнгүүнд аймгийн Хөгжимт драмын театрын нийт уран бүтээлчид болон ахмад, залуу үе үеийн төлөөлөл оролцсон томоохон хэмжээний тоглолт болов.

Дашрамд дурдахад, аймгийн хэмжээнд зохиогддог “Хаврын баяр” цэнгээнт бүжгийн тэмцээн, “Бяцхан мисс” , “Бяцхан жентельмэн” уралдаан, “Өвлөн бүжье” ардын бүжгийн наадмыг бүжиг дэглээч Ц.Алтанцэцэг зохион байгуулдаг.

Хөгжмийн багш, удирдаач МУСТА, Б.Батжаргал 1977 онд театрт анх хөгжимчнөөр орж, 33 жил ажиллаж байгаа ажээ. Энэ хугацаанд 200 гаруй нийтийн дуу, 80 шахам бүжгийн хөгжим, хөгжимт драмын дуурь зэрэг бүтээлийг удирджээ. Мөн 50 шахам дуу, 30-аад бүжгийн хөгжмийг зохиожээ.