Монголын волейболын холбооны 16 дахь удаагийн үндэсний лигийн аварга шалгаруулах тэмцээний финалын тоглолтууд Спортын төв ордонд үргэлжилж байна. Эрэгтэйчүүдийн төрөлд аваргын төлөө  “Эрчим” болон “Буянт-Ухаа” багууд өрсөлдөж байгаа бол эмэгтэйчүүдийн төрөлд “Энагура”, “Эрчим” багууд аваргын төлөө өрсөлдөж байна. Харин хүрэл медалийн төлөө эрэгтэйчүүдээс “Ноён”, “Уурхайчин” багууд, харин эмэгтэйчүүдийн төрөлд “Уурхайчин” болон “Тэнүүн огоо” багууд өрсөлдөж байгаа юм.

Шигшээ тоглолтууд өчигдөр эхэлсэн бөгөөд эрэгтэйчүүдээс “Буянт-Ухаа” баг 3:2 харьцаатай, эмэгтэйчүүдээс “Энагура” 3:1 харьцаатай тус тус ялалт байгуулж, эхний ялалтаа авчээ. Харин хүрэл медалийн төлөө өрсөлдөж буй “Ноён” баг /эрэгтэй/ 3:1-ээр “Уурхайчин”-г, эмэгтэйчүүдээс “Уурхайчин” 3:0-ээр “Тэнүүн огоо”-г тус тус хожжээ.

Лигийн дүрмээр түрүүлж гурван хожил авсан нь ялагч болох бөгөөд лигийн аварга шалгаруулах тэмцээний аварга баг энэ сарын 16-нд тодорно.

С.Цэлмэг