Харин энэ хугацаанд Монголын төр Сотогийн зөвлөгөөг бодит ажил хэрэг болгох талаар юу хийсэн бэ гэдэг нь сонин. Уг нь түүнийг ирээд буцсаны дараахан улс төр, эдийн засгийн хүрээнийхэн их л хөл хөөр болцгоож “Бид улс орноо хөгжүүлэх гарцыг олчихлоо. Одоо бүх өмч хөрөнгөө паспорттой болгоод гүйцээ…” хэмээн ам уралдан ярьж байсан санагдана. Гэвч “Сонин дээрээ соохолзоно, сониноо буухаар гоохолзоно” гэгчээр тэгсгээд л мартаж орхив. Засгийн газар 2010 оныг “Бизнесийн орчныг шинэтгэх жил” болгосон гээд бүртгэлийн системтэй холбоотой зарим зөвшөөрөл, лицензийн тоог цөөлөх гэх мэт мэр сэр ажил хийсэн. Одоо үүнийгээ эд хөрөнгийн бүртгэлийн тогтолцоог сайжруулах чиглэлээр авсан томоохон арга хэмжээ гэж тодорхойлох биз. Үнэн хэрэгтээ Эрнандо Де Сотогийн хэлсэн энгийн атлаа өргөн далайцтай тэр санааг эдийн засгийн хөгжлийн хөшүүрэг болгон ашиглах талаар нүдэнд харагдаж, гарт баригдтал хийсэн зүйл огт алга.
Монголд 7.5 тэрбум ам.доллараар үнэлэгдэх өмч ямар ч бүртгэлгүй, үхмэл хөрөнгө хэлбэртэй байна гэдгийг ноён Сотогийн удирдлага дор ажилладаг судлаачид хэдхэн хоногийн дотор тодорхой болгоод өгсөн шүү дээ. Гэтэл бид энэ их үнэ цэнэтэй капиталаа эдийн засгийн эргэлтэд оруулах ажил хийхийн оронд уул уурхайгаас амар хялбар аргаар яаж тав, гурван төгрөг унагах вэ гэж л улайрч байна. Төрийнхөн Сотогийн зөвлөгөөг аль хэдийнэ мартаж орхиод тулга тойрсон маргаандаа мансуурч суугаа гэхэд болно. Харин олон улсын болон төрийн бус зарим байгууллагынхан түүний зөвлөгөөг хэрэгжүүлэх талаар багагүй зүйл хийсэн шүү. Жишээ нь, Мянганы сорилтын сангаас “Эд хөрөнгийн эрхийн улсын бүртгэлийн үйл ажиллагаа, мэдээллийн технологийг сайжруулах зөвлөх үйлчилгээ” нэртэй төсөл хэрэгжүүүлж байгаа. Тэд энэ хүрээнд Улсын бүртгэлийн ерөнхий газрын үйл ажиллагаанд дэмжлэг үзүүлэхээс гадна олон нийтийн ойлголт, хандлагыг өөрчлөх зорилгоор нийгмийн шинжтэй реклам телевизээр байнга цацаж байгаа. Түүнчлэн АНУ-ын Олон улсын хөгжлийн агентлагийнхан өнгөрсөн намар сэтгүүлчидтэй хамтран “Өмчийн эрх ба эдийн засгийн өсөлт” сэдэвт дугуй ширээний ярилцлага зохион байгуулсан. Энэ мэтээр төрийн бус байгууллагынхан тодорхой ажил хийж болоод байхад УИХ, Засгийн газар ерөнхийдөө унтаа байдалтай байна. Дээр дурьдсан 7.5 тэрбум ам.долларын үхмэл хөрөнгийнхөө чухам хэдийг нь бүртгэж, хэдийг нь эзэнтэй болгосон юм бүү мэд. Гэхдээ энд үүнээс илүү анхаарууштай нэг зүйл бий. Эрхэм Сото “Эдийн засгийн ухааны ноён оргилуудын нэг” хэмээн дэлхий дахинд үнэлэгддэг ч бид заавал гадны хэн нэгний хэлснийг ягштал биелүүлж, тахин шүтээд байх албагүй. Харин айлаас гуйхаас авдраа уудалсан нь хамаагүй дээр. Монголчууд “Эзэн нь юмаа мэдэж, эрэг нь усаа хашна” гэж ярьдаг. Өмч хөрөнгөө үнэгүйдүүлэхгүй байх зарчмыг бидний өвөг дээдэс тов тодорхой хэлчихсэн л байна шүү дээ. Гагцхүү эдгээр үнэ цэнэтэй үгсийг хий цэцэрхэн ярих бус, хөгжлийн оргилд хүргэх жигүүр болгон ашиглаж сурмаар байна. Товчхондоо бол “Сотогийн үгийг мартсан байж болно. Харин…” гэж л хэлэх гэсэн юм.
Зохиогчийн эрх:
"Улс төрийн тойм" сонин