Завхан аймгийн Нэгдсэн эмнэлгийн хүүхдийн тасгийг түшиглэн “Хөгжлийн бэрхшээлтэй болон суурь өвчтэй хүүхдүүдийн нөхөн сэргээх клиник сувилал”-ыг нээн ажиллууллаа. Энэ сувилалыг нээснээр цус багадалт, сульдаа, тураалтай хүүхдүүдийг хүлээн авч эмчлэн эрүүлжүүлэх боломж бүхий тохилог орчин бүрдүүлж эцэг эхчүүд, хөгжлийн бэрхшээлтэй хүүхдүүдэд баяр баясгалан бэлэглэсэн юм.

Дашрамд сонордуулахад аймгийн Нэгдсэн эмнэлэг 65.0 сая төгрөгийн хөрөнгө оруулалтаар цусны банкийг центрфугтай болгосноор цусны бэлдмэлүүдийн нэр төрөл олширч, эмэгтэйчүүдийн болон дотор эрхтний өвчний хүндрэл эмчлэгдэх, төрөл бүрийн цус алдалтаас бүрэн урьдчилан сэргийлэх нөхцөл боломж бүрдээд байна. Мөн 260.0 сая төгрөгийн термостатыг лабораторт суурилуулснаар гистологийн зарим шинжилгээнүүдийг өөрийн орон нутагтаа хийж эхлээд байгаа таатай мэдээ байна.