Жишээ нь, “Эрдэнэт” үйлдвэр гэхэд 68 хувийн татварт жилдээ 450 тэрбум төгрөг төлдөг байсан бол шинэ хуулиар 190 тэрбум төгрөгийн татвар төлөхөөр болж байгаа юм. Зөвхөн нэг аж ахуйн нэгжид л ийм их ялгаа гарч байгаа болохоор шинэ хуулийн ач холбогдол өндөр байх нь тодорхой.
Хуулийн хэлэлцүүлгийн явцад татварын хувь хэмжээг тохирох гэж гишүүд нэлээд ширүүхэн маргаан өрнүүлж байсан. Тухайлбал, өмнөх хуулийн автор УИХ-ын гишүүн Н.Батбаяр шинэ татварын хувь хэмжээг аль болох өндөр байлгах гэж багагүй бухимдсан юм. Өөрийнх нь санаачилсан хуулийг хүчингүй болгочихсон болохоор өнөөдрийг хүртэл тэр тун ууртай яваа. Тэрбээр, зэс, алтад ногдуулах нөөц ашигласны төлбөрийн хэмжээг тус бүр 18 хувь болгох гэж баахан зүтгэсэн. Харин Д.Дамба-Очир нарын гишүүд “Төсвийн орлогын гол ачааг үүрч яваа “Эрдэнэт” мэтийн том үйлдвэрээ нэмж дарамтлах хэрэггүй” хэмээн хамгаалсны хүчинд роялтийн хувь хэмжээг нэлээд бууруулж чадсан юм. Гэнэтийн ашгийн 68 хувийн татвар хүчингүй болоогүй байсан бол энэ онд зөвхөн зэсээс л гэхэд 527.7 тэрбум төгрөгийн орлого орж ирэх ёстой байв. Гэхдээ үүнээс гадна Монгол Улсын Засгийн газрыг олон улсын шүүхийн тавцанд аваачсан, алт олборлогчид татвараас зугтах нөхцөлийг бүрдүүлсэн гээд сөрөг тал нь бүр ч их. Угаасаа анх 68 хувь гэж тогтохдоо дэлхийн уул уурхайн жишгийг огт бодолцоогүй. Бараг л “Монголын тамирчин сүмогийн 68 дахь их аварга болсныг бэлгэшээгээд ингэж шийдсэн” гэсэн инээдтэй яриа байдаг. Харин шинэ хуулийн онцлог нь хувь хэмжээг хатуу тогтоолгүй тухайн бүтээгдэхүүний үнэ дэлхийн зах зээлд дээр хэрхэн хэлбэлзэхээс хамаарах юм. Тодруулбал, тонн зэсийн үнэ 8000 ам.доллараас дээш гарвал нөөц ашигласны төлбөр 10 хувьд хүрнэ. Мөн алтны үнэ 1300 ам.доллараас давах бол одоо байгаа таван хувь дээр дахин таван хувийг нэмэх жишээтэй. Энэ мэтээр хатуу тогтсон бус, тоон утгаараа хэлбэлзсэн татвар байх юм. Үндсэндээ ашигт малтмал тус бүрийн онцлогийг харгалзаж, төлбөрийн хувь хэмжээг тогтооно гэдгээрээ нэлээд онцлогтой. Гэхдээ одоохондоо энэ төрлийн татварыг авч эхлэх хараахан болоогүй. УИХ-ын хаврын чуулганаар Ашигт малтмалын тухай хуулийн 47 дугаар зүйлд өөрчлөлт оруулж байж дээрх хууль хүчин төгөлдөр болох юм. УИХ, байнгын хорооны гишүүд ч энэ асуудалд нэлээд нухацтай хандсан гэхэд болно. Энэ онд зэсийн үнэ нэлээд өсөх төлөвтэй байгаа. Зэсийн үнийн төлөвийг гаргадаг олон улсын байгууллагууд тонн зэсийн эрэлт хийгээд үнэ ойрын гурван жилд хурдацтай нэмэгдэхийг байнга онцолж буй. Тиймээс Засгийн газраас өргөн мэдүүлсэн Өсөн нэмэгдэх ашигт малтмалын нөөц ашигласны төлбөрийн тухай хуулийн төсөлд зэсээс авах төлбөрийг 15 хувь хүртэл нэмэгдүүлж тусгасан юм. Уг хуулийн дагуу зөвхөн зэс, алт ч бус цайр, молибден, гянт болд, төмрийн хүдэр, тэдгээрийн баяжмал, хайлуур жонш, хар, цагаан тугалга, түүхий болон боловсруулсан нүүрс зэрэг нийт 12 хоёр төрлийн ашигт малтмалын бүтээгдэхүүнийг хамруулахаар тусгаад байгаа юм.
Манай улсын уул уурхайн салбарын өнгийг тодорхойлж байгаа томоохон ордуудаас зөвхөн нэг бус, бусад төрлийн ашигт малтмалын хүдэр хавсарсан байдлаар олдох нь элбэг. Тиймээс олон нэр төрлийн бүтээгдэхүүнээс татвар авдаг байх нь монголчуудын ирээдүйд тун ч хэрэгтэй. Ялангуяа дэлхийд томоохонд тооцогдох стратегийн ордууд эдийн засгийн эргэлтэд орж байгаа энэ эгзэгтэй үед хэт хатуу бус, уян хатан, басхүү олон талын ач холбогдолтой татварын тогтолцоо бүрдүүлж байгаа нь их зөв гарц хэмээн эрдэмтэд үнэлж байна. Ер нь уул уурхайн салбараа тогтвортой хөгжүүлсэн улсууд Өсөн нэмэгдэх нөөц ашигласны төлбөрийн аргыг түгээмэл ашигладаг аж. Энэ нь голчлон хоёр хэлбэрээр татвар ногдуулдаг. Нэг хэсэг нь татварын хэмжээг ашгийн түвшинтэй шууд уялдуулдаг бол нөгөө хувилбар нь бүтээгдэхүүн үйлдвэрлэсэн хэмжээ, борлуулалтын дүнгээс хамаардаг юм билээ. Уул уурхайн салбар нь хөгжлийн босгон дээр байгаа манайх шиг улсын хувьд хоёр дахь хэлбэрийг сонгох нь ашигтай. Яагаад гэвэл, татварын хэмжээг шууд ашгийн хэмжээтэй нь уялдуулах юм бол компаниуд өгөөжөө нэмэгдүүлэх тал дээр хойрго хандаж, аль болох арга заль хэрэглэхийг оролддог аж. Тиймээс үнэ ханшийн хэлбэлзэлтэй уялдах хэлбэрийг сонгох нь манайд хамгийн тохиромжтой гэдгийг Засгийн газар олж харж чадсан байна. Ямартай ч манай улс уул уурхайн салбарыг сандралд оруулаад байсан нэг хуульд “Баяртай” гэж хэлж чадлаа. Харин сайн замд хөтлөх шинэ хуулиа аятайхан угтаад авчих хэрэгтэй байна. Эрхэм гишүүд маань хувийн амбиц хөөж, хамаагүй “шоудаж” байгаад баллачихгүй л бол татварын шинэ тогтолцоог хэрэгжүүлэх нөхцөл үндсэндээ бүрдчихээд байна.
Зохиогчийн эрх:
"Улс төрийн тойм" сонин