Нийслэлийн хэмжээнд энэ сарын 5-наас эхэлсэн цэргийн шинэчилсэн бүртгэл 18-ныг хүртэл үргэлжилнэ. Гэтэл нийслэлийн зарим дүүрэгт, тухайлбал Сонигинохайрхан дүүргийн 5,6 дугаар хороо, Баянзүрх дүүргийн 13 дугаар хороон дээр цэргийн бүртгэл хийж буй ажилтнууд нь урьд өмнөх жилүүдэд цэргийн бүртгэл хийлгээгүй иргэдийг 10-50 мянган төгрөгөөр торгоно хэмээн мэдэгджээ. Торгууль төлөхгүй бол бүртгэхгүй гэсэн шаардлага тавьсан нь хэр үндэстэй шаардлага болохыг бид нийслэлийн Цэргийн штабын дарга Ж.Болдбаатараас тодрууллаа.

-Энэ удаагийн цэргийн бүртгэл ямар ч торгууль шийтгэлгүй явагдаж байгаа. Урьд жилүүдэд бүртгүүлээгүй байсан ч торгууль ногдуулах учиргүй. Учир нь энэ удаагийн цэргийн бүртгэлийг  “Цахим Улаанбаатар” хөтөлбөрийн хүрээнд явуулж буй тул ямар нэгэн хариуцлага шийтгэл ногдуулахгүй.

-Цэргийн үнэмлэхийг харилцан адилгүй үнээр олгож байх юм. Нийслэлийн Чингэлтэй дүүргийн гуравдугаар хороонд эл үнэмлэхийг 600 төгрөгөөр өгч буй бол Баянзүрх дүүргийн хороодод 1000-1200 төгрөг авч бичилт хийж буй нь ямар учиртай юм бол?
-Цэргийн үнэмлэхний үнэ 600 төгрөг байгаа. 1000-1200 төгрөгөөр иргэдэд олгож буй бол буруу гэдгийг хэлмээр байна гэлээ.