Нэрээ сольсон МАН-ынхны шүдний өвчин болоод буй УИХ-ын гишүүн Ц.Шинэбаярыг ах намынхан буланд шахахаар оролдож байна. Эгээ л хуучин цагт эсэргүүн этгээдтэй мэнд мэдээд өнгөрсөн болгон эсэргүү хэрэгт холбогдох шахдаг байсан шиг зарим хуучин андууд нь Ц.Шинэбаяраас цэрвэж байгаа. Харин энэ үед Э.Мөнх-Очир огт өөр сэдвээр хийж байсан хэвлэлийн бага хурлын дундуур Ц.Шинэбаярыг өмөөрч дуугаран “Яадаг юм бэ. Би Ц.Шинэбаярыг өмөөрнө. Яагаад хувь гишүүн үзэл бодлоо илэрхийлснийхээ төлөө хавчигдаж байх ёстой гэж… УИХ-ын гишүүнийг гишүүд нь хамгаалах ёстой” гэж түс тас хэлсэнд, удирдлагынхаа үгнээс зөрдөггүй МАН-чуудын үнхэлцгийг нь хагартал айлгаж. Зарим гишүүн Э.Мөнх-Очирыг Ц.Шинэбаярын араас бүлгээсээ гараад гүйчих вий гэж айсан бол зарим нь үе үе зодоон цохионы хэрэгт нэр холбогдчихдог, аюултай бие хамгаалагчтай болов гэж шоглон жуумалзаж байгаа гэнэ. Гэвч хааяа болчимгүй хүүхэд мэт зан гаргадаг Э.Мөнх-Очирыг эр хүн шиг дориун үг хэллээ гэж олон хүн “үнэлж” байгаа бололтой.   

Угаас монголчууд ялагдаж, боорлогдож байгаа нэгнийг өмөөрөх талд зогсдог эерүү сэтгэлтэй хүмүүс. Бас унасан хүнийг бүү өшиглө ч гэдэг. Тийм болохоор МАН-ын бусад гишүүд шиг гөлөлзөөд байлгүй  эрийн шийр заав гэж сайшаах хүмүүс олон байна. Хамгийн гол нь тэрбээр “УИХ-ын гишүүн Ц.Шинэбаярын нэр төрийг гутаах зорилгоор бүхэл бүтэн аппарат ажиллах болсон. Энэ нь өөрөө шударга биш явдал. Яагаад хувь гишүүн үзэл бодлоо илэрхийлснийхээ төлөө ийнхүү хавчигдаж байх ёстой гэж…” гэж хэлсэн нь үнэхээр л хүний олноор тэрс үзэлтэн ганцыгаа авлаж эхэллээ гэсэн сэжиг таамгийг баталгаажуулж байна.

Уг нь өнгөтэй, мөнгөтэй, хэдэн зуун гишүүнтэйгээрээ гайхуулдаг МАН /МАХН/ ганц гишүүнээ цор цор гэсний төлөө ингэтэл их сандарч, бүхэл бүтэн аппарат ажиллуулна гэдэг заан хулганаас айж хөлөө өргөв гэгч болж байна. Гэвч нөгөөтэйгүүр угаас нэг гараар удирдуулж, нэг амаар дуугарч, нэг л ижил өнцгөөр сэтгэх уламжлалтай, өөр бодол санааг сонсохоос, ялангуяа хэн нэг нь түүнийгээ илэрхийлэхээс сүнсээ зайлтал айдаг МАХН-ын “удам”-ын зан харагдаж байх шив дээ…