Өмнийн говьд Оюутолгойн ордыг ашиглах их ажил ундарч буй бол Төрийн ордонд эл ордыг тойрсон маргаан өрнөж,  өдөр бүр шинэ агуулгаар баяжих янзтай. Тодруулбал, УИХ-ын Аюулгүй байдал, гадаад бодлогын байнгын хороо өчигдөр хуралдаж, Эрдэс баялгийн мэргэжлийн зөвлөлийн Оюутолгойн ордыг ашиглах Техник эдийн засгийн үндэслэлтэй холбогдуулан гаргасан дүгнэлтийг ажлын хэсгээр авч хэлэлцсэн талаарх санал дүгнэлтийг сонсох байсан ч чадсангүй, хойшлуулав.  Хуралдааныг хойшлуулахад хүргэсэн гол шалтгаан нь Оюутолгойн хөрөнгө оруулалтын гэрээнд гарын үсэг зурсан Сангийн сайд С.Баярцогт, Байгаль орчин, аялал жуулчлалын сайд Л.Гансүх нар дээрх байнгын хорооны хуралдаанд оролцож, тодорхой хариулт өгөх ёстой ч, Ерөнхий сайд С.Батболдын хамт айлчлалд мордсонтой холбоотой аж.  Ажлын хэсгийн ахлагч УИХ-ын гишүүн Ш.Сайхансамбуугийн тайлбараар эл асуудлыг ирэх долоо хоногийн мягмар гаригт авч хэлэлцэнэ. Энэ үед байнгын хорооны хуралдаан нээлттэй горимд шилжчих тул Оюутолгойн Техник эдийн засгийн үндэслэлтэй холбоотой гаргасан ажлын хэсгийн дүгнэлт олон нийтэд нээлттэй хүрэх боломж ч давхар бас бүрдэх бололтой. Мөн Эрдэс баялгийн мэргэжлийн зөвлөлөөс Оюутолгойн Техник эдийн засгийн үндэслэлтэй холбоотой гаргасан тодорхой заалтуудыг “Айвенхоу майнз монголиа инк” компани өнгөрсөн хугацаанд хэрхэн биелүүлсэн талаарх мэдээлэл ч  ил болно. Хэдийгээр Эрдэс баялгийн мэргэжлийн зөвлөл нь Оюутолгойн Техник эдийн засгийн үндэслэлд бүрхэг туссан тодорхой ажлуудыг хөрөнгө оруулагч тал дахин нягталж, ашиглах зэсийн хүдрийн нөөцийг өсгөсөн нь төслийн үр өгөөжийг дээшлүүлсэн гэж үзэн, 2009 оны гуравдугаар сард Оюутолгойн Техник эдийн засгийн үндэслэлийг баталсан юм. Гэвч иргэний хөдөлгөөнүүдийн зүгээс хатуухан шүүмжлэл хүлээсэн тул УИХ-ын Аюулгүй байдал, гадаад бодлогын байнгын хорооноос байгуулагдсан ажлын хэсгийнхний танилцуулах дүгнэлт өнгөрсөн хугацаанд дуулиан дагуулсан олон маргаантай асуудалд хариулт өгнө гэж хүлээх хэсэг ч бас байна.

Тэгвэл Эрдэс баялгийн мэргэжлийн зөвлөлөөс Оюутолгойн Техник эдийн засгийн үндэслэлийг ямар шалтгаанаар буцааж, дараа нь ямар үндэслэлээр баталсан талаарх мэдээллийг эргэн нэг сануулъя. Тодруулбал, Оюутолгойн хөрөнгө оруулалтын гэрээнд зааснаар тус ордын зэсийн нөөц 45 сая тонноор хэмжигдэж байв. Гэтэл Оюутолгойн Техник эдийн засгийн үндэслэлд хөрөнгө оруулагч тал нөөцөд бүртгэгдсэн зэсийн 25,6 сая орчим тонныг ашиглах боломжтой. Үлдэж буй  19 сая тонн зэсийг ашиглах бололцоогүй гэж байв. Харин УИХ-ын Аюулгүй байдал, гадаад бодлогын байнгын хорооноос байгуулагдсан ажлын хэсэг, мөн Эрдэс баялгийн мэргэжлийн зөвлөлөөс хөрөнгө оруулагч талд хандан Оюутолгойн Техник эдийн засгийн үндэслэлд заасан ашиглах нөөцийн хэмжээг нэмэгдүүлэхгүй бол, өөрөөр ярина шүү гэснээр ямар ч байсан 31.1 сая тонн зэсийг ашиглахаар болж, өөрчлөлт оруулж чаджээ. Үлдэж байгаа 14 сая орчим тонн зэсийг  технологийн шинэчлэл, металлын зах зээлийн үнэ, байгууллагын үйл ажиллагааны зардал багассан тохиолдол бүрт тодотгол хийж, эдийн засгийн үр өгөөжийг тооцохоор тохиролцсон байна. Мөн таван жил тутамд Оюутолгойн Техник эдийн засгийн үндэслэлд тодотгол хийхээр тохиролцож чаджээ.

Гурав дахь өөрчлөлт нь одоогийн дуулиан тариад буй Оюутолгойн хувь нийлүүлэгчдийн гэрээ мөн хөндөгдөөд амжиж. Учир нь Оуютолгойн хөрөнгө оруулалтын гэрээг УИХ-аар хэлэлцэх шатанд хөрөнгө оруулагч талаас төсөлд зарцуулсан зардлын хэмжээ Техник эдийн засгийн үндэслэлд тусгасан зардал хоёр өөр байв. Уг нь бол адил дүн танилцуулах ёстой. Тиймээс  Засгийн газар хөрөнгө оруулагч талтай энэ асуудлаар хэлэлцээр хийж, улмаар шалгалт хийсний дүнд  төслийн нийт хөрөнгө оруулалт 2009 оны эцсийн байдлаар 1,588,4 тэрбум төгрөг гарч, түүнээс хамааралгүй зардлууд болон Оюутолгой төслийн хайгуулын ажлын зардал 508,7 тэрбум төгрөгийг тооцон хасчээ. Үүний үр дүнд Монгол Улсын Засгийн газар, Айвенхоу майнз монголиа инк компани хоорондын хувь нийлүүлэгчдийн зээлийн дүнг 1079.7 тэрбум төгрөгөөр тогтоосон байна.

Дөрөв дэх нааштай шийдэл нь Оюутолгойн төслийн бэлтгэл ажил болох бүтээн байгуулалт, барилгын ажлын хугацаанд 4000-5000 хүн ажиллаж, шууд болон шууд бусаар нийт 10 мянган ажлын байр бий болгох, тэдгээрийн 90 хувь монгол ажилчид байх гэсэн тохиролцоог энэхүү Техник эдийн засгийн үндэслэлд мөн тусгуулжээ. Гэхдээ Оюутолгойн ордыг ашиглаж эхэлснээр ус хэр хүрэлцээтэй вэ гэдэг асуудал асуултын тэмдэгтэй хоцорчээ. Хөрөнгө оруулалтын гэрээнд тусгаснаар уг ордыг 80 жил ашиглахаар тооцоолсон. Харин Оюутолгойн ордыг ашиглаж эхэлснээр өмнийн говь дахь усны нөөц хүрэлцэх үү гэдэгт холбогдох байгууллагууд тодорхой шийдвэр гаргаж чадаагүй байна. Учир нь усны хайгуул одоо ч үргэлжлэн хийгдэж буй юм.

Түүнчлэн эх сурвалжуудын тодотгосноор Оюутолгойн хөрөнгө оруулалтын гэрээг Оюутолгойн хувь нийлүүлэгчдийн гэрээтэй зэрэгцүүлэн харвал асар их ялгаа харагдах гэнэ. Оюутолгойн хувь нийлүүлэгчдийн гэрээнд Монгол Улсад өгөөж нь тусахааргүй, “но”-той заалтууд олноор туссан. Тиймээс Оюутолгойн хөрөнгө оруулалтын гэрээг дахин авч үзэх шаардлагатай.

Харин шинэ он гарахын өмнө Оюутолгойн хувь нийлүүлэгчдийн гэрээнд өөрчлөлт оруулах үүрэг авсан Сангийн сайд С.Баярцогт, Эрдэс баялаг, эрчим хүчний сайд Д.Зоригт нар хөрөнгө оруулагч талтай хэлэлцээгээ удахгүй эцэслэж, асуудлыг нэгмөр шийдвэрлэнэ гэж найдъя.