Биокомбинат төрийн өмчит улсын үйлдвэрийн захирлыг сонгох тендерийг ТӨХ-ноос өнгөрсөн оны 12 дугаар сарын 10-наас энэ сарын 10-ны хооронд зарласан юм. Сонгон шалгаруулалтад оролцогчдын материалыг хүлээн авах хугацаа өчигдрийн 12.00 цагаар тасалбар болж, энэ хугацаанд таван хүн өрсөлдөх хүсэлтээ ирүүлсэн байсан. Өнөөдөр авсан мэдээллээр бол таван өрсөлдөгчөөс хоёрыг сүүлийн шатанд үлдээжээ. Биокомбинатын ерөнхий технологчоор ажиллаж байгаа Ц.Өлзийтогтох, мөн өнгөрсөн оны арваннэгдүгээр сард ТӨХ-ны шийдвэрээр тус үйлдвэрийн захирлаар томилогдож байсан Б.Баттогтох нар сүүлийн шатанд үлдээд байгаа аж.

Улсдаа цорын ганц биологийн үйлдвэр болох тус үйлдвэрийн өнөөгийн захирал Д.Насанжаргал болон ерөнхий технологч Ц.Өлзийтогтох нар тендерийн хууль зөрчин бараа материал авсан, улсад вакцин нийлүүлэх явцдаа мөнгө завшсан зэрэг зөрчлүүд нь ТӨХ-ны шалгалтаар өмнө нь илэрч, хэл ам дагуулж байсан юм. Эл зөрчлүүдээс гадна Биокомбинатын хоцрогдол зэргийг харгалзан үзэж ТӨХ удирдлагыг нь өөрчлөх шийдвэрийг өнгөрсөн оны 11 дүгээр сард гаргаж, Б.Баттогтохыг захирлаар томилсон ч хэрэгжээгүй юм. Учир нь одоогийн удирдлагууд дээрх шийдвэрийг эсэргүүцэн тамга тэмдгээ авч зугтсан. Улмаар ТӨХ захирлын сонгон шалгаруулалт явуулахаар болсон. Энэ мэт асуудлаас болоод Биокомбинатын захирлын сонгон шалгаруулалт олны анхаарал сэдэв болоод байна.