Онц
их хурал хуралдуулж, улс төрд хувьсгал хийхээ мэдэгдсэн МАХН-ын түр
штабынхан хоорондоо хагаралдаж эхэлсэн тухай мэдээлэл ирэв. Тус штабын
ерөнхий зохицуулагч, УИХ-ын гишүүн Ц.Шинэбаяр МАХН хэмээх “хууль бус”
намын дарга, Н.Удвал Ерөнхий нарийн бичгийн дарга болох амбицаа ил тод
илэрхийлсэн нь “Улаан гэр”-ийнхнийг ийнхүү үймүүлжээ. Ингэхээс ч өөр
аргагүй юм. Учир нь Ардын намын нийслэлийн Хяналтын хороо өнгөрсөн сарын
23-нд хуралдаж, МАХН-ын түр шта­бын зохицуулагч Н.Удвал, Ю.Атар, Б.Туяа
на­рыг гишүүнчлэлээсээ хас­сан. Тиймээс хандах нам, очих газаргүй
болсон түр штабынхан МАХН хэмээгч хоосон буйран дээр хий л хөрвөөж, нэг
нэгэнтэйгээ тамгагүй даргын төлөөх тэмцэл өрнүүлж эхэлсэн нь энэ аж. Эх
сурвалжуудын мэдээлснээр, Ю.Атар сая­хан “Пума” ресторанд найз
бүсгүйчүүдтэйгээ уулзаж “Ц.Шинэбаяр нартай сүжир­сэн нь ёстой алдаа
боллоо. Багшийнхаа ажлыг мөрөөрөө хийж явсан нь дээр байжээ. МАХН-ын
нэрээр баахан улстөржсөний эцэст олон түмэнд нэр нүүргүй ч болох юм
байна” хэмээн учирлажээ. Философич С.Молор-Эр­дэ­нийн хувьд ч мөн
ялгаагүй. Тэр­бээр МАХН-ын түр штабын­хантай анх нэгдсэн зарчмаа өөрчилж
“Номоо бичиж явсан минь дээр байж дээ. Найз нөхөд маань намайг
буруугаар ойлгоод байх болж” хэмээн учирлаж яваа сурагтай. Харин МАХН-ын
дарга, генсекийн албанд бие биенээ дэмжихээр тохиролцсон Ц.Шинэбаяр,
Н.Удвал нар “Д.Нинж, Л.Цог нартай хамтран элдэв арга хэмжээ зохион
байгуулахад л хангалттай. Түүнээс биш тэ­дэнтэй хамтарч нам байгуулна
гэж юу байх вэ” хэмээн үгссэн дуулдана. Энэ мэт байдлаас болж, МАХН-ын
түр штабын жирийн гишүүд экс Ерөнхийлөгч Н.Энхбаярт хандах бололтой.
Гэвч тэд “Н.Энхбаяр биднээс нүүр буруулж “Би МАХН-ын түр штабын асуудлыг
мэдэхгүй. Учир нь би Ардын намын Бага хурлын гишүүн шүү дээ” гэвэл яах
бол” хэмээн болгоомжилж байна.