Зорчигч, үйлчилгээний Улаан­баатар төв буудлын ачаалал   “Цагаан сар”-ын өмнөх энэ өдрүүдэд нэмэгдчихээд бай­­на. Цагаан сарын үеэр иргэ­дийг эрээний бараагаар хангах гэсэн ганзагын наймаачид зорчих тасалбар ава­хаар урт дараалал үүсгэж, үүнийг далим­дуулсан шагчид Замын-Үүд чиглэ­лийн билетийг үнэд хүргэж байна гэсэн мэдээллийн мөрөөр өчигдөр Зорчигч, үйлчилгээний Улаанбаатар төв буудлыг зорилоо. Биднийг тус буудалд очиход Замын-Үүд-Улаан­баатар чиглэлийн галт тэрэгнээс ачаа бараагаа буулгаад гарах хаалгыг зүг­лэж буй иргэд, хэн нэгэнд унаа­гаар үйлчилчих гэсэн жолооч нарын үймсэн дүр зураг угтлаа. Хот хоорон­дын тасалбар зардаг танхимд харин ачаалал тийм ч их байсангүй. Иргэд өглөө эрт ирж тасалбар авахаар дугаарлаж байгаа болохоор тэр аж. Гурван кассын өмнө тасалбар байгаа эсэхийг лавласан, авсан билетээ буцаах, өдрийг нь өөрчлүүлэх гэсэн хэдэн хүн л байсан юм. Кассын ажилтнууд иргэдийн ачаалал өнгөрсөн долоо хоногийн сүүлчээс арай гайгүй болсон гэдгийг хэлж байв. Гэсэн ч уламжлалт Сар шинийн баярын ачаалал буурах яагаа ч үгүй байгаа аж. Ямартай ч өглөө эрт касс ажиллаж эхлэх үеэс хүний хөл татрах хүртэл  Төмөр замын цагдаагийн хэлтсийн  20-30 цагдаагийн ажилтан зохицуулалт хийхээр ажиллаж байгаа юм билээ. Цагдаа нар тасалбар авах гэж буй иргэдийг зохицуулахаас гадна, шагчдыг оруулахгүй байх тал дээр анхаарч ажиллаж байгаа аж. Цагдаагийн ажилтнууд тасалбар шагласан таван хүний зургийг самбарт хадсан байв. Төмөр замын цагдаагийн хэлтсийн хошууч н.Туяа “Төмөр замын ачаалал нэмэгдэх үеэр шагийн билет зарах гэсэн хүн мэр сэр гарч ирдэг. Гэхдээ нэг их олон биш. Ийм хүмүүсийг илрүүлж зургийг нь хүмүүст харагдахаар хадсан  байгаа. Цагдаа нар үргэлжлүүлэн хянаж байгаа” хэмээв.

Энэ үер кассын дэргэд байгаа хүмүүсийн дотроос нэг эмэгтэй зарим хүнээс “Билет авахгүй биз” хэмээн асууж байхтай таарсан юм.

-Та билетээ зарах гэж байгаа юм уу. Хэднийх юм бэ?

-Тэгнэ. Хоёр билет байна. Би өөрөө явах гээд авчихсан чинь ажил гараад зарах хэрэгтэй болчихлоо.

-Авбал билет дээр байгаа нэр, регистрийн дугаар зөрчих байх даа?

-Зүгээр ээ. Хамт касс дээр очоод солиулчихна шүү дээ.

-Хэдээр зарах юм бэ?

-Ярилцаж байгаад өгчихнө өө.

 Бид хоёрын дунд ийм яриа өрнөв. Тэрбээр өмнө нь уулзсан болол­той хоёр хүнд “Яасан. Та хоёр билет олов уу” хэмээгээд цааш явсан юм.

Зорчигч, үйлчилгээний Улаан­баатар төв буудлын билет, кассын эрхлэгч С.Өлзийгөөс зарим асуултад хариулт авлаа.

-Улаанбаатар-Замын-Үүдийн чиглэлд зорчигчдын ачаалал нэмэгдсэн байна. Энэ тал дээр ямар арга хэмжээ авч байна вэ?

– Намар хичээл сургууль эхлэх үеэр болон сар шинийн баяраар энэ чиглэлийн зорчигчдын ачаа­лал ихэсдэг.  Манайхаас холбогдох бүх арга хэмжээгээ л авч ажиллаж байна. Долоо хоногийн хоёр өдөр буюу Лхагва, Бямба гарагт нэмэлт суудлын 44 дүгээр галт тэргийг ая­луулж байна. Түүнчлэн Замын-Үүд-Улаанбаатарын чиглэлд өдөр бүр явдаг 276 дугаар галт тэргэнд гурван вагон нэмж байгаа. Одоогийн байдлаар урьдчилгаа тасалбар ирэх лхагва гарагаас эхлээд бүх өдрийнх бай­гаа. Харин долоо хоног бүрийн мягмар гарагийн оройны нэмэлт галт тэрэгний тасалбар дууссан.

-Зорчигч ихэссэн ийм үед ша­гийн тасалбар гарч ирдэг. Энэ тал дээр?

-Манай байгууллагын зүгээс Төмөр замын цагдаагийн хэлтэст энэ талаар урьдчилж албан бичиг хүргүүлээд одоо хамтран ажиллаж байна. Тасалбар шаглах гэсэн хүмүүс байгаа. Гэхдээ шагийн тасалбар аваад хохир­сон хүн гараагүй. Тухайн зорчиг­чийн  бичиг баримтыг үндэс­лэн тасалбар олгодог болохоор нэр нь зөрвөл үйлчлэхгүй гэсэн үг. Зорчигч­дод тасалбарыг  хоёр сар хүртэл хугацаагаар урьдчилан худалдан авч болно гэдгийг анхааруулмаар байна. Түүнчлэн манай төмөр замын тасалбар худалдаалалт ца­хим сүлжээнд орчихсон. Тиймээс тасалбарыг сүлжээнд орсон өртөө, зөр­лөгөөр нэгэн зэрэг худалдаалж байгаа.

-Сая нэг хүн гар дээрээс билет за­рах гэж байгаатай таарлаа. Билет дээр байгаа нэр, регистрийн дугаа­рыг сольж болдог юм уу?

-Болохгүй. Манайд нэр солих ямар ч үйлчилгээ байхгүй. Ямар нэг хүндэтгэх шалтгаанаар явж чадах­гүй гэсэн тохиолдолд хувийг нь суутгаад буцаалт л хийж болдог. Мөн явах хугацаагаа хойшлуулъя гэсэн тохиолдолд тухайн өдрийн тасалбар нь байвал хойшлуулж болно.

Биднийг албаны хүмүүстэй уулзаад гарч ирэхэд нөгөө эмэгтэй гадаа мөн л хэдэн хүнтэй ярилцаад зогсч байв. Улаан чемодан барьж нүдэндээ нулимс цийлэгнүүлсэн охин хаа нэг тийшээ яарсан ч тасалбар олдоогүй бололтой. Харин хар хүрэмтэй эмэгтэй “Эгч нь тэр холоос өсгийтэй гуталтай гүйж ирэх гэж хэцүүдлээ. Чиний улаан чемодан нүдэнд харагдаад. Түрүүний тасалбарыг хоёр хүн авчихсан” гэж хэлээд цааш одов. Тэднээс хэдэн төгрөгөөр тасалбар авсныг нь сонирхоод “Хүний гар дээрээс авсан тасалбар нэр нь зөрдөг учраас болдоггүй” гэсэн хэмээхэд  “Билет аваагүй ээ” гэх аж. Харин иргэдийн олонх нь “Та шагийн тасалбар худалдан авах уу” гэсэн асуултад  “Үгүй” хэмээн хариулж байлаа.

Зохиогчийн эрх:
"Улс төрийн тойм" сонин