Эрүүл мэндийн сайд С.Ламбаа өчигдөр Монголын уламжлалт эмнэлэг, сургалтын Манба дацан хийдийн үйл ажиллагаатай танилцав. Тус хийдэд эмнэлэг, уламжлалт эмийн үйлдвэр, Шинжээч Оточ лаборатори, “Оточ манрамба” дээд сургууль тус тус үйл ажиллагаа явуулдаг байна. Манба дацан хийд нь 1990 онд, харин Оточ Манрамба Дээд Сургууль 1991 онд байгуулагдан Уламжлалт анагаах ухааны бакалаврын зэрэгтэй их эмч, сувилахуйн бакалаврын зэрэгтэй мэргэжилтэнг бэлтгэж байгаа аж. Мөн байгуулагдсан цагаасаа эхлэн дотоодын  зуу гаруй мянган хүнд, гадаадын 3000 гаруй хүнд уламжлалт  эмнэлгийн тусламж үйлчилгээ үзүүлсэн талаар   тус хийдийн тэргүүн хамба, гэвш Д.Нацагдорж танилцуулав.

Харин “Оточ Манрамба” дээд сургуулийн оюутнууд уламжлалт анагаах ухааны талаар бичигдсэн төвд эх сурвалж бичгүүдийг мэргэжлийн түвшинд ашиглаж чаддагаа, түүнийг амьдралд хэрэгжүүлж байгаагаа танилцуулжээ. Тус сургуульд зургаан жил суралцаж, уламжлалт анагаах ухаан болон өрнийн анагаах ухааны мэдлэг чадварыг эзэмшдэг аж. Эрүүл мэндийн сайд энэ үеэр “Уламжлалт анагаах ухааны түүхэн судрууд бүхий номын санг үзэж сонирхож явахдаа төвд судраас орчуулга хийж суугаа оюутан залуусаар бахархах сэтгэл төрлөө. Оюутнуудыг уламжлалт анагаах ухаанд сургаж байгаа сургалтын цогц арга барил нь ёс зүйтэй мэргэжилтнийг бэлтгэн гаргах үндэс болж өгнө гэдэгт итгэж байна” гэжээ.

Дашрамд дуулгахад, Эрүүл мэндийн яамны албаны хүмүүсийг Манба Дацан хийдэд зочлох үеэр тус хийдийн лам нар Монголын ард түмний эрүүл мэнд, урт удаан наслах, өвчин зовлонгүй аз жаргалтай амьдрахыг хүсэн ерөөж, Манал бурхан болон Анагаах ухааны Шанлон, Дамжан сахиуснуудад Гүсүнтүгийн мандал өргөж даатгал хийжээ.