Монголын хөрөнгийн биржийг зүглэсэн улс төр, эдийн засгийн ашиг сонирхолтой хүмүүсийн тэмцэл далдхан бөгөөд хүчтэй өрнөж байна. Харин тэдний дундаас нэг эрхэм буйраа орхин явахаар зэхэж, энэ тухай шивэр авир гэх болжээ. Энэ нь тус биржийн одоогийн гүйцэтгэх захирал Р.Содхүүгийн сонголтын тухай юм. Тэрбээр Улсын Мэргэжлийн хяналтын ерөнхий газрын даргын сонгон шалгаруулалтад оролцохоо мэдэгдсэн байна. Өөрийг нь үүрэгт ажлаас нь чөлөөлөх шийдвэр хараахан гараагүй байхад дараачийн албан тушаалын тухай бодож явах болсон нь Лондонгийн биржтэй хамтарч ажиллах гэрээтэй холбоотой болов уу.

Монголын хөрөнгийн бирж Лондонгийн биржтэй хамтарч ажиллах гэрээг оны өмнөхөн баталсан бөгөөд гэрээний дагуу хийгдэх ажлууд эхлэх гэж буй. Үүний хүрээнд удирдлагын багт нэлээд халаа сэлгээ хийж магадгүй ба албан тушаалын энэ шуурганд өртөнө гэдгээ Р.Содхүү дарга урьдчилан мэдсэн бололтой. Түүний энэ таамаг оргүй ч зүйл биш байх. Учир нь Ерөнхий сайдаар тэргүүлсэн Монголын хөрөнгийн биржийг хөгжүүлэх ажлын хэсэг юуны түрүүнд тус байгууллагын менежментийг чадваржуулна гэж удаа дараа мэдэгдэж байсан. Одоо гэрээ байгуулсан болохоор захирал болон түүний багт халаа сэлгээ хийж магадгүй юм.