Иран улсын иргэний агаарын тээврийн Боинг-727 онгоц 100 гаруй зорчигч тээвэрлэж яваад, Ираны баруун хойд хэсэгт осолдож, нийт зорчигчдын 33-ыг нь аварч, 72 хүн амь эрсдээд байна. Уг онгоц нь Тегранаас хөөрч, Тегранаас баруун хойш 700 км зайд орших Урумияа хотод газардах ёстой байсан ч ням гаригт орон нутгийн цагаар 19:45 цагт Урумияа хотын ойролцоо унаж осолджээ. Осол болсон газарт их цастай, харанхуй байсан тул аврах ажиллагаа харьцангуй удаашралтай явагдсан байна.
Холбогдох албаны хүмүүсийн мэдээллээр осолдсон онгоц цагийн хуваариасаа хоцорч хөөрсөн бөгөөд цаг уурын нөхцөл муугаас болж унахад хүрсэн гэжээ.  Гэвч энэхүү онгоцны ашиглалтын хугацаа бараг дуусч байсан, засч сэлбэх ажил бага хийгдэж байсантай ослын шалтгааныг холбож тайлбарлаж болзошгүй байна. Хэдийгээр онгоц осолдох үедээ хэдэн хэсэг болж хуваагдсан ч, азаар ямар нэг дэлбэрэлт болоогүй байна. Сүүлийн жилүүдэд Ираны агаарын тээврийн салбарт хэд хэдэн осол гарч байсны дотор хамгийн сүүлд 2009 оны долдугаар сард 168 зорчигчтой онгоц Ираны хойд хэсэгт осолдсон юм.

Б. Энхцэцэг