АТР-гийн энэ улирлын нээлтийн тэмцээн Катарын нийслэл Доха хотноо болж, дэлхийн чансааны номер хоёр Рожер Федерер финалын тоглолтод ОХУ-ын теннисчин Николай Давыденког буулган авснаар Qatar Open тэмцээнд гурван удаа түрүүлсэн анхны теннисчин боллоо. Өнгөрсөн жилийн тэмцээний хагас шигшээд Федерер Давыденкод хожигдож байсан ч энэ удаад өрсөлдөгчөө 6-3; 6-4 харьцаагаар буулган авч, карьерынхаа 67 дахь түрүүг авсан байна. Тэрбээр өмнө нь 2005 болон 2006 онд Катарын нээлттэй тэмцээнд тэргүүлж байсан юм.

Өдгөө 29 настай Федерер финалын тоглолтод ердөө ганц удаа давуулалт алдсан бөгөөд форм сайтай байгаагаа харуулж, өрсөлдөгчөө төвөггүй хожжээ. Харин Давыденко хагас шигшээд дэлхийн номер нэг теннисчин Рафаэль Надалийг хожиж, шуугиан тарьсан ба энэ удаад өнгөрсөн жилийн амжилтаа давтаж, финалд шалгарлаа. Харамсалтай нь, шийдвэрлэх тулаанд ялагдсанаар Федерерийн эсрэг нийт 17 удаа тоглож, 15 удаад нь ялагдаад байна.

Надалийн биеийн байдал тааруу байсан боловч тэрбээр нутаг нэгт Марк Лопезтой хосолж, тэмцээний хосын төрөлд Италийн Даниэль Браччиали, Андреас Сеппи нарыг 6-3; 7-6 харьцаагаар хожиж, хосын төрөлд аваргалжээ.