Хөрөнгийн бирж оны эхний долоо хоногийн арилжаа амжиллтай явуулж таван удаагийн арилжаагаар 46 ХК-ийн 1.6 сая ширхэг хувьцааг 467.1 сая төгрөгөөр худалджээ. Топ-20 индекс 15486.99 нэгж байгаа нь өмнөх долоо хоногийнхоос 727.18 нэгжээр буюу 4.9 хувиар өсчээ. Индексийн сагсад багтах Адуунчулуун /36.3 хувь/, Мах импекс /16.7 хувь/, Шарын гол /11.7 хувь/, АПУ /5.5 хувь/, Багануур /4.8 хувь/, МЦХ /2.9 хувь/, Таван толгой /2.6 хувь/, Дархан нэхий /2хувь/ зэрэг ХК-иудын үнэт цаасны ханш өссөн нь индексийн өсөлтөд нөлөөлсөн байна.

Зах зээлийн нийт үнэлгээ 39.0 тэрбум төгрөгөөр буюу 2.8 хувь өсч, 1 их наяд 412.9 тэрбум төгрөг болсон байна. Ханш нь өссөн үнэт цаасны тоонд Адуунчулуун /36.3 хувь/, УББҮК /18.8 хувь/, Мах импекс /16.7 хувь/, ханш нь буурсан үнэт цаасны тоонд Монгол шир /14.3 хувь/, Бөөний худалдаа /13.3 хувь/, Хай би ойл /5.6 хувь/ зэрэг ХК-иудын үнэт цаас орж байна. Нийт 46 үнэт цаас арилжигдсанаас 18 үнэт цаасны ханш өсч, 11 үнэт цаасны ханш буурч, 17 үнэт цаасны ханш тогтмол байлаа.
Тоо ширхгээр хамгийн олон ширхэг арилжигдсан үнэт цаасанд Женко тур бюро /981.6 мянган ширхэг/, Хөх ган /389.9 мянган ширхэг/, Хай би ойл /65.5 мянган ширхэг/ зэрэг ХК-ийн үнэт цаас орж байна. Үнийн дүнгээр БиДиСек /129.3 сая төгрөг/, Женко тур бюро /87.3 сая төгрөг/, АПУ /74.4 сая төгрөг/ зэрэг ХК-ийн үнэт цаас  арилжаалсан байна.