УИХ-ын дарга Д.Дэмбэрэл энэ сарын 6-ны өдөр 03 тоот захирамж гаргаж, Монгол Улсын Их Хурлаас 2010 оны арванхоёрдугаар сарын 30-ны өдөр баталсан Монгол Улсын Их Хурлын чуулганы хуралдааны дэгийн тухай хуульд нэмэлт, өөрчлөлт оруулах тухай хуулийг 2011 оны нэгдүгээр сарын 01-ний өдрөөс мөрдөж эхэлсэнтэй холбогдуулан хэвлэл, мэдээллийн байгууллагаас тавьсан санал, хүсэлтийг судлан үзэж санал боловсруулах үүрэгтэй ажлын хэсгийг Төрийн байгуулалтын байнгын хорооны дарга Ж.Сүхбаатараар ахлуулан байгуулсан билээ.

Ажлын хэсгийн хэсгийн бүрэлдэхүүнд УИХ-ын гишүүн З.Алтай, Э.Бат-Үүл, Су.Батболд, Ж.Батсуурь, Р.Гончигдорж нарын гишүүд багтан дээрх хуулийг Үндсэн хуулиар хамгаалагдсан мэдээлэл олж авах эрх, ялгаварлан гадуурхагдахгүй байх зэрэг эрхийг зөрчихгүй байх хуулийн төслийг боловсруулахаар болсон юм. Тэдний боловсруулж буй хуулийн төсөлд Байнгын хорооны хуралдаанд сэтгүүлчдийг нэвтрэхийг зөвшөөрсөн, хуралдааны үйл ажиллагааг сурвалжлах эрхтэй байдлаар тусгажээ. Гэхдээ хуралдааны танхимд камер нэвтрүүлж бичлэг хийлгэхийг хориглох нь зүйтэй гэж Ажлын хэсгийнхэн үзсэн бололтой байна.