Авто уралдааны хаан ангилал гэгддэг “Формула нэг”-т хөл тавьсан анхны Энэтхэг эр болох Нараин Картикеян зургаан жил завсарласны эцэст “Формула нэг”-ийн уралдааны талбарт эргэн ирж байна. Тэрбээр энэ улирлаас эхлэн Испанийн “Hispania” багийг төлөөлөн уралдахаар гэрээ байгуулжээ. “Багагүй хугацаа өнгөрсөн байна. Гэхдээ 2011 оноос дахин Формула нэгт уралдах болсондоо туйлын их баяртай байна. Надад одоо ч гэсэн бие бялдар, нөөц бололцоо, амжилт гаргах хүсэл тэмүүлэл бий гэдэгт итгэлтэй байгаа. Түүнчлэн аравдугаар сард анх удаагаа эх орондоо Энэтхэгийн гран-прид уралдахыг тэсэн ядан хүлээж байна” хэмээн 33 настай Картикеян ярьжээ.

Дэлхийн хамгийн хурдан энэтхэг эр гэгдэх болсон Нараин Картикеян 2005 онд тухайн үед байсан “Jordan” багаас “Формула нэг”-ийн гараагаа эхлүүлж, удаахь хоёр жил нь “Williams” багийн туршилтын нисгэгч нь байсан юм. Түүнээс хойш Картикеян Энэтхэг улсыг төлөөлөн Мотоспортын дэлхийн цомын цувралд оролцож, Ле Маны 24 цагийн уралдаанд хурд сорьж, долдугаар байрт шалгарч байлаа.

Өнгөрсөн улирлаас эхлэн “Формула нэг”-т бүртгэлтэй болсон “Hispania” багийн хоёр нисгэгч өнгөрсөн улиралд 11, 12 дугаар байрт шалгарсан юм. Харин энэ улиралд бүрэлдэхүүнээ бүрмөсөн өөрчлөхөөр шийдсэн тус багийг төлөөлж, Картикеяны хамт хурдны зам дээр гарах нисгэгчийг одоохондоо зарлаагүй байна.