УИХ-ын Дэгийн тухай хуульд байнгын хороодын хуралдааныг сэтгүүлчдэд хаалттай болгосон, сэтгүүлчдийг ажилласан жил, боловсролын төвшнөөр ялгаварлах заалтуудыг оруулж, түүнээс улбаалан парламентын сэтгүүлчид тав хоногийн турш ажил хаяад байгаа билээ.

Сэтгүүлчдийн мэдээлэл олж авах эрх, хэвлэлийн эрх чөлөөг хязгаарласан, тэднийг ажлын ур чадвар, боловсролын байдлаар ялгаварласан эдгээр хаалтыг цуцлуулахаар УИХ-ын эрхэм гишүүн С.Эрдэнэ, Ц.Сэдванчиг, Д.Ганхуяг нар хуулийн төсөл боловсруулж байна. Тэд уг хуулийн төслийг ирэх даваа гаригт Засгийн газарт хүргүүлж санал аваад мөн өдрөө УИХ-ын даргад өргөн мэдүүлэхээр төлөвлөөд байгаа ажээ.

Тэдэнтэй зэрэгцэн УИХ-аас гаргасан ажлын хэсэг мөн хуульд нэмэлт, өөрчлөлт оруулахаар ажиллаж байна. Ийнхүү Монгол Улсын Ерөнхийлөгчийн санал болгосноор УИХ-ын гишүүд хуульд өөрчлөлт оруулахаар хоёр зэрэгцээ төсөл боловсруулан ажилдаа орлоо.