Хэнтий аймгийн хэмжээнд төрийн байгууллагуудад мөрдөгдөж буй дүрэм журмыг нягтлан шалгах, журамлах ажлыг зохион байгуулах ажлын хэсгийг Засаг даргын захирамжаар байгуулж ажиллажээ. Уг ажлын хэсэг аймгийн Мэргэжлийн хяналтын газар, Стандартчилал хэмжил зүйн хэлтэс, Улсын бүртгэлийн хэлтэс, Татварын хэлтэс зэрэг байгууллагуудад ажиллаж хүчин төгөлдөр мөрдөгдөж байгаа дүрэм журмуудыг хянаж үзэхэд Мэргэжлийн хяналтын газраас иргэдэд эрүүл мэндийн дэвтрийг үндэслэлгүй олгож, төлбөр хурааамж авч байсан, ерөнхий боловсролын сургуулийн сурагчдаас үндэслэлгүй төлбөр хураамж авдаг, Хэрлэн сумын Засаг даргын тамгын газраас иргэдэд тодорхойлолт олгохдоо хураамж авдаг, Улсын бүртгэлийн хэлтэс үйлчилгээний төлбөр хураамжийг үндэслэлгүй нэмэгдүүлсэн, Биндэр сумын Иргэдийн төлөөлөгчдийн хурлаас баталсан иргэдэд эрүүл мэндийн үйлчилгээг төлбөртэй үзүүлэх журам гаргасан зэрэг олон зөрчлийг илрүүлж дээрх шийдвэрүүдийг хүчингүй болгох талаар холбогдох албан тушаалтнуудад үүрэг өгч биелэлтэнд хяналт тавьж ажиллалаа.

2009-2010 онд улс орон нутаг, төсөл хөтөлбөрийн хөрөнгөөр хийх барилга угсралт, их засварын ажлын гүйцэтгэгчийг сонгон шалгаруулах тендерт холбогдох хуулийн “орон нутгийн давуу эрх олгох” тухай заалтыг хэрэглэн аймаг орон нутгийнхаа аж ахуйн нэгжүүдийг дэмжих бодлого барьж ажилласны үр дүнд энэ онд хийгдсэн зам, барилга угсралт, их засварын ажлын гүйцэтгэгчийн болон тоног төхөөрөмж бараа материал нийлүүлэгчийн сонгон шалгаруулалтанд “Төрийн болон орон нутгийн өмчийн хөрөнгөөр бараа ажил үйлчилгээ худалдан авах тухай” хуулинд заасны дагуу орон нутгийн давуу эрх олгож ажилласнаар энэ жил нийт 59 худалдан авах ажиллагаа зохион байгуулсны 70 хувийг орон нутгийн аж ахуйн нэгжүүд тендерт шалгарч үйл ажиллагаа явууллаа.

“Жижиг, дунд үйлдвэрийг дэмжих дэд сан”-гийн хөнгөлөлттэй зээлийг 2009 онд ХАС банкаар дамжуулан олгосон нь иргэдэд хөрөнгө мөнгө болон цаг хугацааны хувьд хүндрэл бэрхшээлтэй байгааг Засгийн газрын хэрэгжүүлэгч агентлаг Жижиг дунд үйлдвэрийн газар болон “Жижиг дунд үйлдвэрийг хөгжүүлэх сан”-д хүсэлт тавин уламжилж 2010 оны хөнгөлөлттэй зээлийг ХААН банкаар дамжуулан олгосон нь иргэд, аж ахуйн нэгжүүдийн цаг хугацаа, мөнгө хөрөнгийг хэмнэсэн үр дүнтэй ажил боллоо. Согтууруулах ундаа худалдах, түүгээр үйлчлэх тусгай зөвшөөрлийн хугацааг сунгахад тухайн аж ахуйн нэгжээс бүрдүүлдэг байсан 10 нэр төрлийн бичиг баримтын тоог цөөлж шат дамжлагыг багасгав.