Төрийн өмчийн хорооны ээлжит хуралдаан өчигдөр болж, 12 асуудал хэлэлцэж шийдвэрлэжээ. Эрчим хүчний системийн тогтвортой, тасралтгүй, найдвартай ажиллагааг хангах зорилгоор Диспетчерын үндэсний төвд Реле хамгаалалт, автоматикийн алба байгуулахаар шийдвэрлэсэн байна. Үүнтэй холбогдуулан “Диспетчерийн үндэсний төв” төрийн өмчит хязгаарлагдмал хариуцлагатай компанийн бүтцийн өөрчлөлтийг дүрмэндээ тусгаж, Хувь нийлүүлэгчдийн хуралд оруулж шийдвэрлүүлэхийг компанийн гүйцэтгэх захирал Б.Төрбат, Төлөөлөн удирдах зөвлөлд төрийн өмчийн төлөөлөл хэрэгжүүлж буй гишүүдэд үүрэг болгожээ.

Мөн “Оргил рашаан сувилал” ТӨХК-ийн гүйцэтгэх захирал Т.Сүхбаатарыг үүрэгт ажлаас нь чөлөөлж, Ц.Сүхбаатарыг томилохыг тус компанийн Төлөөлөн удирдах зөвлөлд төрийн өмчийн төлөөлөл хэрэгжүүлж буй гишүүдэд үүрэг болгожээ. Түүнчлэн “Монсам” ТӨХХК-ийн гүйцэтгэх захирал Ц.Нямцэрэнг үүрэгт ажлаас нь чөлөөлж, түүнтэй байгуулсан “Хөлсөөр ажиллах гэрээ”-г цуцлахыг компанийн төлөөлөн удирдах зөвлөлд, Ц.Очирбатыг үүрэг гүйцэтгэгчээр томилохыг тус компанийн Төлөөлөн удирдах зөвлөлд төрийн өмчийн төлөөлөл хэрэгжүүлж буй гишүүдэд үүрэг болгосон байна.

“Монгол шуудан” Авто замын газар, Дуурь бүжгийн эрдмийн театр зэрэг нийт найман газрын үндсэн хөрөнгийг худалдах, актлах,  шинээр худалдан авах зэрэг асуудлыг хэлэлцэн шийдвэрлэсэн гэв.