Дэлхий нийтээр худалдан авах, өдөр тутамдаа хэрэглэхийг хүсэх болсон iPad, iPhone, Hybrid engine буюу цэнэгээр ажилладаг тээврийн хэрэгсэл зэргийн зарим чухал эд ангийг газрын ховор элементийн оролцоотойгоор бүтээдэг. Харин газрын ховор элементийн үйлдвэрлэлийн 97 хувийг Хятад улс эзэлдэг байна. Тиймээс тус улс энэ давуу байдлаа ашиглаж оны өмнөхөн ховор элементийнхээ гадаадад гаргах квотыг огцом бууруулсан. Мөн ингэж багасгаснаас гадна экспортын татвараа нэмсэн нь дэлхийн зах зээлийн үнэд нөлөөлөх нь тодорхой болоод байна. Тухайлбал, нэн ховорт тооцогддог 18 элементээс неодиумын татварыг гэхэд л 25 хувиар нэмсэн аж. Үүнээс шалтгаалж уг элементийн килограмм тутмын үнэ 19 доллараас 88 доллар болж өссөн байна. Улмаар Хятад улс дээрх хязгаарлалтаа энэ оны эхний зургаан сар хүртэл барихаа мэдэгдээд байгаа юм. Мэдээж ийм алхам хийхийг нь өндөр технологи шингэсэн бараа үйлдвэрлэгч улсууд урьдаас мэдэж байсан тул ховор элемент импортлох гурав дахь улсыг хайж эхэллээ. Японы Засгийн газар гэхэд газрын ховор элементийг хайх, тогтвортой хангамжийг бий болгох зорилгоор энэ оны төсөвтөө их хэмжээний мөнгө суулгасан. Мөн ховор металлын болон ураны хүдрийн шинэ орд газар хайх ажиллагааг дэмжих зорилгоор тус улс ажиглалтын хиймэл дагуулыг манай улсад худалдахаар шийдсэн байгаа. Энэ нь Дэлхийн банкны шинжээчид манай улсын газрын ховор элементийг 10 тэрбум ам.доллараар үнэлсэнтэй холбоотой байж мэдэх юм. Түүнээс гадна АНУ-ын Батлан хамгаалах яамны “GOA” институтээс гаргасан судалгаагаар Японы Хятадаас худалдан авсан ховор элементийн нөөц гуравхан сарын хугацаанд л хүрэлцэхээр үлдсэн аж. Уг нь газрын ховор элемент дан ганц Хятадад их хэмжээгээр байдаггүй юм. Харин эдгээрийг газрын гүнээс олборлоход эдийн засгийн үр ашиггүй байдал үүсэх эрсдэлтэй тул энэ төрлийн олборлолт явуулахыг хүсэгчид ховор байдаг бололтой. АНУ-ын Калифорни мужид 1960-аад оны үед “Mountain Pass” хэмээх ордоос олборлолт хийдэг байж. Тухайн үедээ газрын ховор элементийн 80 гаруй хувийг энэ уурхайгаас хангадаг байсан. Харин технологийн хөгжил АНУ-д гэхээсээ илүү Азид, тэр дундаа Японд хүчтэй хөгжиж байснаас үүдэн энэ зах зээлд хожуу орж ирсэн Хятад улс илүүрхэх болсон байна.
Үндэсний хөгжил, шинэтгэлийн хорооны Хувийн хэвшил, инновацийн бодлогын хэлтсийн дарга Б.Арвинбаяраас зарим зүйлийг тодрууллаа.
-Газрын ховор элементээ хятадууд үнэлэх боллоо. Үүнийг дагаад манайд тодорхой боломжууд нээгдэж байна уу?
-Газрын ховор элементийг тээж зөөвөрлөхөд их амархан. Нүүрс, зэс шиг галт тэргээр зөөх шаардлагагүй. Бага хэмжээтэй болохоор онгоцоор зөөгөөд аваад явчихна. Тэгэхээр манай уул уурхайн салбарт давуу байдал, алтернативыг бий болгож байна. Хоёрхон сарын өмнө бид Германы мэргэжилтнүүдийг урьж газрын ховор элементийн талаар санал солилцлоо. Цаашид хамтран ажиллах боломж харагдаж байна. Бас Ерөнхийлөгчийн Японд хийсэн айлчлалын дараагаар япончууд манай улсын газрын ховор элементийг сонирхох боллоо. Сонирхох нь ч аргагүй. Манай улсын хил дээр шахуу Хятадын Баян-Овоо гээд дэлхийн зах зээлийн 50 хувийг бүрдүүлдэг орд байгаа юм чинь.
-Сонирхож байгаа улс зөвхөн Япон, Германаар зогсохгүй байх аа?
-Ер нь сонирхож байгаа улсууд байгаа. Солонгосчууд хүртэл сонирхож байна. Япончууд нэлээд анхаарал хандуулж байна. Ер нь ховор элементийн зах зээл байгаа өөр улсуудыг ч ажиглаж, судалж л байгаа байх. АНУ гэхэд Калифорни мужид “Mountain Pass” хэмээх ордоо дахин ашиглахаар болж байна. Япон зөвхөн манайд биш Вьетнамын Засгийн газарт хүртэл хандсан гэсэн. Солонгосчууд ч бас Бирм гэдэг цэргийн дарангуйлагчтай улсын Засгийн газарт хандаад байна.
-Ховор элементтэй холбоотой эрхзүйн зохицуулалт ямар байдалтай байна?
-Энэ асуудал нэг их яригддаггүй байсан. Бид “Эрдэнэт” үйлдвэрээс гарч байгаа зэстэй хамт маш их ховор элементийг гадагшаа гаргачихаж байгааг саяхнаас л анхаарч эхэлсэн. Энэ чиглэлээр бид уул уурхайн судалгаа шинжилгээний хүрээлэнгүүдийг хөгжүүлэх, бодлогын чиглэлийн арга хэмжээг нэн түрүүнд авах хэрэгтэй байна.
Зохиогчийн эрх:
"Улс төрийн тойм" сонин