Их Британийн Нисэх  онгоцны бууд­лаас есдүгээр сарын 17-ны өдөр  тус улсын тусгай алба­нынханд баривчилагдсан Мон­гол Улсын иргэн Б.Хурцад хол­богдох шүүх хурал маргааш бол­но. Түүнийг Германы талд шил­жүүлэх эсэхийг хэлэлцэх ан­хан шатны шүүх хурал өн­гөр­­сөн хугацаанд таван удаа бол­сон юм. Энэ удаагийнхад Мон­гол Улсын Засгийн газрыг төлөөлж Гадаад харилцааны яамны төрийн нарийн бичгийн дарга  Д.Цогтбаатар орол­цо­хоор өнөөдөр Лондонг зорино. Уг асуудалтай холбоотой ма­най талаас арав гаруй хүний бүрэлдэхүүнтэй байгуулагдсан аж­лын хэсгийн ахлагч Гадаад харилцааны яамны Дэд сайд Б.Болороос шүүх хуралтай холбоо­той мэдээллийг тодрууллаа.

-Маргааш  болох  Б.Хурцын шүүх хуралд манайхаас хичнээн хүн явах вэ. Шүүх ажиллагааны үеэр Монгол Улсаас оролцож буй төлөөлөгчид ямар үүрэгтэй оролцох юм бол оо?

-Засгийн газрыг төлөөлж ма­най яамны Төрийн нарийн бич­гийн дарга Д.Цогтбаатар орол­цохоор маргааш/өнөөдөр/ Лондон явна.  Монгол Улсаас тус улсад суугаа Онц бөгөөд бүрэн эрхт Элчин сайд Б.Алтангэрэл, ЭСЯ-ны зөвлөх Н.Батаа, Тусгай үүрэг гүйцэтгэгч Ц.Болор,  болон өм­гөө­лөгчид оролцоно. Манай төлөөлөгчдийн зүгээс шүүх ажил­лагааны шийдвэрт нөлөөлөх  боломжгүй, ажиглагчийн байр суурьнаас оролцоно гэсэн үг л дээ. Өнгөрсөн арваннэгдүгээр сард товлогдож хойшилсон шүүх хурлын үеэр манай та­лаас Б.Хурцыг Германы талд шилжүүлэхгүй байх олон улсын эрх зүйн тодорхой үндэслэлээр тайлбар гаргасан шүү дээ. Тэдгээр үндэслэлийг нарийвчлан авч үзэх  нь зүйтэй гэсэн шийдвэр гарч хурал хойшилсон.

-Б.Хурцын гэр бүлийнхэн Лон­донд очсон уу?

-Гэр бүлийнхэн нь очсон. Шүүх хуралд оролцоно.

-Англи улсаас Монгол Улсад суух Элчин сайд ноён Диксоныг  урхи тавьж Б.Хурцыг баривчлуулсан гэсэн мэдээлэл хэр үндэслэлтэй вэ?

-Манай улсын иргэн Б.Хурцын шүүх хуралд өмгөөллийн ажил­ла­гаа явуулах өмгөөлөгчдөөс  ноён элчин сайд асан Диксонтой хол­боотой асуудлыг шүүх ажил­лагааны үеэр тавина. Манай ажлын хэсэг өмгөөлөгч нартай байнга холбоотой ажиллаж байна. Шүүх хурлын шийдвэрийг  урьдчилан хэ­лэх боломжгүй. Манай талд шийд­вэр гарах болов уу гэж найдаж байна. 

-Маргааш болох шүүх хурал манай цагаар хэдэн цагт болох вэ?

-Монголын цагаар оройн 18.00 цагаас шүүх хурал  болно. Бид хуралтай холбоотой мэдээллийг ирэх лхагва гаригийн шөнө авчихна.  Шаардлага гарвал ажлын хэсэг шуурхай хуралдана.

-Ажлын хэсгийг ахлаж байгаа хүний хувьд та шүүх хурлын процессийн талаар мэдээлэл өгөхгүй юм уу?

-Би гадагшаа томилолтоор өнөөдөр явчихна. Тиймээс Б.Хур­цын шүүх хурлын үеэр байхгүй. Гэхдээ энэ асуудлыг хариуцаж Г.Баясгалан үлдэж байгаа.

-Өмнөх хойшлогдсон шүүх хуралд Хуульзүй, дотоод хэргийн яамны ажилтан  оролцож байсан. Энэ удаад яах вэ?

-Тухайн үед Хуульзүй, дотоод хэр­гийн яамны Төрийн нарийн бич­гийн дарга Г.Баясгалан Европын хол­бооны улсад ажлаар явж таарсан болохоор Б.Хурцын шүүх хуралд оролц­сон. Түүнээс биш томилогдож оч­сон юм биш. Тиймээс энэ удаа­гийн хуралд монголоос нэг л хүн явна.

-Шүүх хурал олон удаа хойшлох нь манай талд ашигтай юу. Энэ удаагийн шүүх хурал эцсийн шатны шүүх ажиллагаа байж чадах уу?

-Шүүх хурал хойшлохыг үгүйсгэхгүй. Шүүх хурал хойшлох нь бидэнд ашигтай байж чадахгүй шүү дээ.  Бид  аль болох богино хугацаанд иргэнээ өөрийн талд шилжүүлэн авах хүсэлтэй байгаа. Ажлын хэсэг ч  бүх боломжоо дайчлан ажиллаж байна.

-Хэрэв  маргаашийн  шүүх хурлын шийдвэр манай талд шийдэгдвэл Б.Хурцыг гурван сар гаруй хорьсон Английн эрх бүхий албаныхан ямар хариуцлага хүлээх вэ. Өөрөөр хэлбэл Монгол Улсын дипломат  ажилтныг баривчилсан явдалд?

-Английн хууль хяналтынхан хариуц­лага хүлээнэ гэсэн ойлголт байх­гүй. Маргааш болох  шүүх хурлаар Б.Хурцыг Германы талд шилжүүлэх эсэхийг хэлэлцэнэ. Гер­маны талаас 2006 онд Евро­пын холбооны улсад хандаж гаргасан түүнийг баривчлах тухай шийдвэрийн дагуу  Их Британийн эрх бүхий албанынхан баривчилсан уч­раас ямар нэгэн хариуцлага хү­лээх асуудал ярихгүй. Мөн Б.Хур­цыг цагаатгах  гэсэн ойлголт ч байхгүй юм.

-Б.Хурцтай та холбогдсон уу. Хоригдож буй шоронгоос нь  утсаар   харилцаа тогтоож байгаа гэж сонссон?

-Яг одоогоор түүнийг гэм буруутай нь шүүхээр тогтоогдоогүй нөхцөлд  хүмүүстэй уулзах, утсаар ярих гээд эрх нь нээлттэй. Би шууд утсаар холбогдсон зүйлгүй. Ингэж холбогдохын тулд цаг авах хэрэгтэй байдаг. Харин Англид суугаа манай элчин сайдын яамны ажилтнууд болон өмгөөлөгчид нь байнга харилцаа холбоотой байгаа. Биеийн байдал нь хэвийн гэсэн.