Урал, Сибирийн газрын тосны асар их нөөц олдоод байгаа нь Оросын эдийн засгийн өсөлтийг хурдасгах сайхан боломж хэмээн тус улсын албаны төлөөлөгчид нэг бус удаа мэдэгдэж байсан. Тиймээс энэ хүрээнд Хятад тэргүүтэй Азийн орнууд, цаашлаад Европ руу хийх худалдаагаа өргөтгөх сонирхолтой байгаа юм.
Энэ удаа Хятадын зүүн өмнөд мужийг Сибирьтэй холбосон шинэ хоолойгоор өдөрт 300 мянган баррель, жилд 15 сая тонн газрын тос тээвэрлэх төлөвлөгөөтэй байна. Ойрын 20 жилд энэхүү нормоо алдахгүй ажиллах юм. Уг хоолойн бүтээн байгуулалтын хоёрдугаар хэсэг 2014 онд дуусна. Ингэснээр нийт 4700 км үргэлжлэх шинэ замаар газрын тос тээвэрлэх аж. Дамжуулах хоолойн ажлыг хариуцсан Хятадын төлөөлөгч, “Петрочайна” компанийн ерөнхий менежер Яо Вэй “Хятад, Оросыг холбосон газрын тосны хоолой нь эрчим хүчний салбар дахь хоёр орны харилцааг шинэ шатанд гаргах эхлэл болж байгаагаараа онцлогтой” хэмээн ярьжээ. ОХУ-ын Ерөнхий сайд Владимир Путин энэ талаар “Шинэ хоолой байгуулснаар Орос улс экспортоо нэмэгдүүлэх чухал алхам боллоо” гэсэн байна.
Дэлхийд газрын тосны үйлдвэрлэлээр Орос, хэрэглээгээр Хятад тэргүүлдэг. Өнгөрсөн 2009 онд ОХУ газрын тосны үйлдвэрлэлээрээ Саудын Арабыг ардаа орхиж дэлхийд тэргүүлэх болсон. Харин Хятадын хувьд 2010 онд газрын тосны хэрэглээгээрээ АНУ-ын урд орсон юм.
Эдгээр орны хувьд өмнө нь газрын тосны худалдааг зөвхөн төмөр замаар байсан билээ. Харин дамжуулах хоолой барих ажил саатаж байсан шалтгаан нь талууд үнийн хувьд тохиролцоонд хүрч чадахгүй байсантай холбоотой юм. Энэ удаад ч үнийн тал дээр бага зэрэг маргаантай байна.
Оросын хувьд энэ сараас эхлэн газрын тосны экспортын татвараа 4.5 хувиар өсгөж, тонн тутамд 303.8 ам.долларын хураамж авдаг байсан бол түүнийг 317.5 ам.доллар болгон нэмсэн байна. Өөрөөр хэлбэл, Хятадтай газрын тосны худалдаагаа эхлүүлж байгаа боловч татвараа улам нэмсээр байгаа гэсэн үг юм.
Өнгөрсөн 2009 оны хоёрдугаар сард ашиглалтад орсон дээрх хоолойн бүтээн байгуулалтад зориулж ОХУ-д зээл олгох асуудлыг Хятадын тал шийдвэрлэсэн. Тиймээс уг ажлыг гардан хариуцаж байгаагийн хувьд цаашид Оросын экспортын татварыг нэмэгдүүлэхгүй байх тал дээр дорвитой алхам хийх аж. Энэ талаар Хятадын Шатахууны бодлогын тухай судалгааны төвийн захирал Панг ЧангВэй мэдэгджээ. Тиймээс экспортын татварынхаа үнийг тал хувь хүртэл нь бууруулах саналыг Оросын талд тавиад байгаа юм. Хэрэв энэ тал дээр тохиролцоонд хүрч чадвал Хятадын тал жилд 15 сая тонн газрын тос авах ба түүний төлбөрт 69 сая ам.доллар өгөх тооцоо байна.
Өнгөрсөн баасан гарагт биржүүд хаагдах үед газрын тосны үнэ бага зэрэг өсчээ. Ирэх сард нийлүүлэлтэд гарах нэг баррель газрын тос Нью-Йоркийн Худалдааны бирж дээр 92.06 ам.доллар болж, 2008 оны аравдугаар сараас хойшхи хамгийн өндөр үнэд хүрсэн байна. Газрын тосны үнэ энэ онд ч өсөх хандлагатай байгаа. Үүний шалтгааныг Хятадын эрэлттэй холбон тайлбарлаж болох юм. Шинжээчдийн үзэж байгаагаар Хятадын газрын тосны эрэлт энэ онд таван хувиар өсөх магадлалтай аж.
Зохиогчийн эрх:
"Улс төрийн тойм" сонин