Түр болов амсхийсэн УИХ-ын гишүүд өнөөдөр хаврын чуулгандаа ирцгээнэ. Дааганаас унадаггүйг сануулсан иргэний хөдөлгөөнүүд их хурлын гишүү­дийн амыг асуухаар өнөөдөр мөн л жагсана. Хэрэвзээ эрхэм ги­шүүд амласнаа биелүүлэхгүй бол зөөлөн сэнтийгээсээ буухыг тулгах л тэдний гол зорилго оршиж буй. Дан ганц иргэний хөдөлгөөн гэлтгүй эмч, багш нарын цалингаа нэмүүлэх гэсэн ширүүхэн шаард­лага тэднийг хүлээж байна. Хав­рын чуул­ганаар шийдэх хамгийн чухал асуудлыг тэргүүн эгнээнд иргэ­ний хөдөлгөөн, эдийн засагч­дын шүүмжлэлийг хүлээж, гүй­цэт­гэх засаглалынхны чадан ядан тайл­барлахыг оролдож буй Оюутол­гойн гэрээг ёсоор болгож нэг мөр асуудлыг шийдэж, их ажлыг эхлүүлэх явдал. Эх орны хиш­гийг өгч эхлэх тухай мэдэгд­сэн гүйцэтгэх засаглалын шийд­вэрийг хэрэгжүүлж, тэдэнд ажил­лах боломжийг УИХ олгох нь хамгаас чухал.  
Нийгэмд хүлээгдэж буй Тавантолгойн ордыг хэрхэн ашиглах, түүнийг тойрсон асууд­лыг шийдвэрлэх гарцыг олох, төрийн оролцоог тогтоох нь урьд урьдын чуулганаас энэ удаагийн чуулганыг онцолж буй юм.
Энэхүү ордын нүүрсний олбор­лолт, нүүрс баяжуулах, угаах үйлдвэр байгуулах, тээ­вэрлэлт буюу төмөр зам, авто зам, эрчим хүч, усны хангамжийг шинээр бий болгох, бүтээгдэхүүн борлуулах, хилийн боомтын чадавхийг нэмэгдүүлэх болон хөрш орнуудын далайн боомтыг ашиглах, нэмүү өртөг шингэсэн бүтээгдэхүүн үйлдвэрлэх зэрэг олон асуудлыг шийдвэрлэж, шинэ боломж бий болгох хаврын чуулганы гол зорилго оршино гэж хэлсэн ч болно.
Тиймээс ч яахын аргагүй Монголын хөгжлийн түүхэнд чухал ач холбогдол бүхий асууд­луудыг шийдэх нэн хариуц­лагатай, басхүү ширүүхэн эсэр­гүү­цэлтэй хаврын чуулганы нээлт халуухан болох нь дамжиггүй.

Л.ТӨГС