Нийслэлийн Баянзүрх дүү­рэгт  өнгөрөгч сарын 30-нд таксины жолоочийг буудаж амь насыг нь хөнөөсөн хэрэг гарсан бол өнгөрөгч сарын 27-ны орой Баян-Өлгий аймагт буун дуу гарсан гэх мэдээлэл байна. Эх сурвалжийн хэлс­нээр тус аймгийн Шуудан холбооны газрын  дарга болон бусад удирдах албан тушаалтнуудын дунд нам, улс төрийн маргаан үүссэнээс буу шийдэмдээ хүрсэн бололтой.  Буун дуу гаргасан хүмүүсийн дунд   аймгийн ИТХ-ын төлөөлөгч МАН-ын бүлгийн даргын алба хашдаг нэгэн байсан аж. Энэ талаар тодруулахаар Баян-Өлгий аймгийн Засаг дарга С.Хавалтай  утсаар холбогдлоо.

-Танай аймагт буун дуу гарсан гэх мэдээлэл байна. Яг юу болсон юм бэ?
-Манай аймгийн ард түмэн эв найрамдалтай, бие биеэ буудаж хөнөөх улс биш.  Биднийг хооронд нь хагаралдуулах гэсэн хэсэг хүмүүсийн худал  мэдээлэл байж болох юм.

-Нэр бүхий албан тушаалт­нууд намаараа талцан маргалд­санаас буун дуун гарсан гэх юм?

-Баян-Өлгий аймаг бол өвөрмөц онцлог, соёл зан заншилтай бүс нутаг. Ард түмэн нь  бие биеэ хүндэлдэг, сайхан уламжлалтай. Буудалцаан болсон гэдгийг би мэдээ­гүй. Үүнээс дэлгэрэнгүй мэдээ­лэл өгөх боломжгүй  гэсэн юм.

Мөн бид тус аймгийн Цагдаагийн хэлтсийн дарга Бахиттай холбогдлоо.

-Танай аймагт  буун дуу гар­сан гэх мэдээллийг тодруулах гэсэн юм. Хүн шархтаж гэмтсэн юм биш биз?

-Прокурорын зөвшөөрөлгүй ямар ч мэдээлэл өгөх боломжгүй. Сая­хан тийм журам гарсан юм.

-Танай аймгийн Иргэдийн хурал дахь МАН-ын бүлгийн дарга бусадтай маргалдаж буу ший­дэмдээ тулсан гэх мэдээ­лэл манайд ирсэн юм. Энэ үндэс­лэлтэй мэдээлэл мөн үү ?

-Хэргийн тухай мэдээлэл өгөх эр­х надад байхгүй. Аймгийн Про­курорын газрын  даргаас мэдээлэл авч болно гэв.

Харин Баян-Өлгий аймгийн Проку­рорын газрын дарга Х.Жани­бек  “Буудалцсан талаарх мэдээл­лийг  тодруулсны дараа өгье” гэлээ. Одоогоор буун  дуу гарсны улмаас хүний амь нас эрсэдсэн эсэх нь тодорхойгүй байна. Тус аймгийн эрх бүхий албан тушаалтнууд дээрх мэдээллийг нууцалж байгаа бололтой.