Сонгинохайрхан дүүргийн 13 дугаар хороо буюу  нэгдүгээр хорооллын 10 дугаар байрны доод давхрын гараашид өнөөдөр 07.10 цагт машин шатаж байна гэсэн дуудлага иргэдээс иржээ. Дуудлагын дагуу нийслэлийн Онцгой байдлын газрын Аврах, гал унтраах 26 дугаар ангийг очиход “Энүүжин” ХХК-ийн барьсан орон сууцны барилгын 45 автомашины багтаамжтай суурийн давхар дахь гараашид гал гарч байсан аж.

Галын үеэр дээрх гараашид байсан “HRW” загварын автомашин бүрэн шатаж, харин “Газ-53” загварын машины арын хэсэг шатаж байсныг унтраасан байна.

Энэ үеэр Шуурхай удирдлагын төвийн жижүүрийн бүрэлдэхүүн нэмэлтээр ажиллаж, тус байрны дөрөвдүгээр орцонд амьдардаг 75 оршин суугчийн  амь насыг авран, гараашид байсан 51 автомашиныг шатахаас сэргийлж чаджээ. Шинжээчид гал гарсан шалтгааныг тогтоохоор ажиллаж байна.

П.Наран