Улсын сан хөмрөгийг арвижуулан, шинэчлэх зорилгоор жил бүр дүрслэх урлаг болон хөгжмийн, хүүхдийн бүтээл худалдан авдаг. Энэ сарын эхээр үзэгчдийн хүртээл болсон “Шилдэг бүтээл 2010” үзэсгэлэнд илгээсэн уран зураг, баримал, монгол зураг, уран дархан, сийлбэр зэрэг дүрслэх урлагийн бүхий л төрлөөр туурвисан 80 уран бүтээлчийн 170 гаруй бүтээлээс шалгаруулж, шилдэг 13-ыг улсын сан хөмрөгт худалдан авлаа.

Улирч буй оны шилдэг бүтээлээр С.Бадралын “Хөвгүүдийн дуун”, Б.Чогсомын “Тарлан хайрхан”, Ё.Далх-Очирын “Цагаан агула”, Ц.Энхжингийн “УМ-1”, Ц.Эрдэнэцогтын “Тэнгэрийн цааз”, Г.Сэрээтэрийн “Дэлгэр хангайн зун”, Ц.Цэгмэдийн “Ертөнцийн цуурай” уран зураг, П.Цогтбаатарын “Базар өвөө явж байна”, Д.Батзоригийн “Хэзээ ч ургадаггүй мод” баримал, С.Дагвадоржийн “Миний газар шороо” инстоляци, Д.Дорждэрэмийн “Хөрөг ярилцлага цуврал”, Т.Энхболдын “Нүүдэл суудал” холимог техникийн бүтээл, Д.Баттөмөрийн “Түрүү морины магтаал” уран бичлэг шалгарлаа.