![](https://news.mn/wp-content/archive1/biznes/photo/2010/5/94d22ae7c078295f/bbc404fa07a7e854big.jpg)
Санхүү, эдийн засгийн хямралын улмаас өнгөрч буй онуудад инфляцийн түвшин сүүлийн 10 жилд байгаагүйгээр өссөн. Тухайлбал, 2008 онд инфляцийн түвшин дээд цэгтээ хүрч, 33 хувь болсон нь манай улс санхүүгийн хямралд орохыг сануулсан байв. Түүнээс хойш өнөөдрийг хүртэл Монголбанкнаас авч хэрэгжүүлж буй мөнгөний хатуу бодлогын үр дүнд инфляцийн түвшин энэ онд 11.1 хувь хүрээд байгаа юм. Өнгөрсөн онд инфляцийг бууруулахын тулд Монголбанкнаас бодлогын хүүгээ 14 хувь хүртэл өсгөж байсан бол өнөөдөр Монголбанкны бодлогын хүү 11 хувьтай байгаа. Гэсэн ч Монголбанкны ээлжит хурлаар ирэх онд инфляци өсч, бодлогын хүү нэмэгдэх төлөвтэй байгааг анхааруулсан. Ирэх онд тараах бэлэн мөнгөний уршгаар инфляцийн хэмжээ 2008 онд дээд цэгтээ хүрч байснаас ч илүү өсч гипер буюу гурван оронтой тоонд хүрэх магадлалтай байгааг Дэлхийн банк, Олон улсын валютын сангаас судалгаагаар тогтоосон. Тиймээс ирэх жил мөнгөний хатуу бодлогоор инфляцийг тогтоож чадах уу үгүй юу гэдэг нь эргэлзээтэй байгаа юм. Инфляци галзууртлаа өсч байсан ч бодит эдийн засгийг өсгөн, бүтээн байгуулалт, ажлын байр бий болгох үйл явц үргэлжилж байхад эдийн засаг гольдролоороо хөгжихийг эдийн засагчид хэлж байгаа. Харамсалтай нь ирэх оны төсвийн зарлагад салхинд хийсгэх мөнгөний төлөвлөгөө батлагдсан. Өнгөрсөн онд ч энэ алдаа давтагдсаныг судлаачид сануулсаар байгаа юм. Учир нь 2009 онд төсвийг тэнцвэржүүлэх бодлогыг үргэлжлүүлэн төсвийн сахилга батыг тууштай мөрдөж, валютын ханшийн уян хатан бодлого баримтлан, мөнгөний бодлогыг инфляцийг доогуур түвшинд барихад чиглүүлэхэд зориулан урьтаж арга хэмжээ авах боломж байсан. Гэхдээ үүнийг хэрэгжүүлээгүйгээс болж, манайх эдийн засгийн хямралд өртсөн. Мөн 2009 онд уул уурхайн салбараас их хэмжээний орлого төсөвт төвлөрөхтэй холбогдон гарч болзошгүй бүтцийн шилжилтүүд, орлогын урсгалыг оновчтой зарцуулахад шаардлагатай төсвийн бодлогыг судалж, энэ онд авах арга хэмжээ боловсруулаагүй нь өнөөдөр бий болоод байгаа “Оюутолгой”, “Тавантолгой”-н асуудлууд үүсэхэд нөлөөлснийг ч мэргэжилтнүүд буруушааж байгаа. Гэхдээ өнгөрсөн онд гэрэл гэгээтэй зүйл харагдаж байсан нь ашигт малтмалын бүтээгдэхүүний үнийн өсөлт тогтворжсон явдал байсан. Үүнээс гадна 2009 онд худалдааны алдагдал буурч, Монголбанк мөнгөний чангатгасан бодлого баримталсан, гадаад валютын нээлттэй үнэ хаялцуулах худалдаа хийж эхэлсэн нь валютын ханшыг тогтвортой байлгах нөхцөл бүрдүүлж өгсөн. Энэ нь Монголбанкинд валютын нөөцөө үргэлжлүүлэн хуримтлуулах боломжийг олгож өнөөдөр Монголбанкны валютын нөөц хоёр тэрбум ам.долларт хүрээд байна.
Р.САРАНГОО
Зохиогчийн эрх:
"Улс төрийн тойм" сонин