Үндэсний аюулгүй байдал, геофолитик гээд олон чухал асуултад хариу нэхэн, маргаан
дагуулсаар байсан “Шинэ төмөр зам”
төслөө Монгол Улсын Засгийн
газар өнгөрсөн долоо хоногийн пүрэв гаригт УИХ дахь намын бүлгүүдэд танилцуулж, улмаар ард түмэндээ зарлав. Монголын баруун хязгаараас зүүн хязгаар руу
чиглэх энэхүү төмөр зам Тавантолгой-Сайншанд-Чойбалсан хотыг
дайрч, Зүүн хойд
Азийн орнууд руу довтолгоно. Тодруулж хэлбэл, Засгийн газар хөндлөн тэнхлэгийн
төмөр замыг хамгийн ашигтай
маршрут гэж үзжээ.
Ингэснээр Тавантолгой, Оюутолгой зэрэг стратегийн орд газруудад нуугдаж байгаа
баялгийг эдийн засгийн эргэлтэд оруулахдаа түүхийгээр нь
дан ганц урд хөрш рүү зөөвөрлөх бус эцсийн бүтээгдэхүүн болгон,
экспортод гаргах нь илүү эдийн
засгийн ач холбогдолтой гэж тооцоолжээ. Ерөнхий сайд ард түмэндээ хандан хэлсэн үгэндээ “Энэ зам алсдаа дорнод болон төв, говийн бүс дэх зэс,  нүүрс, төмөр, уран, нефтийн ордуудыг найдвартай дэд бүтцээр
хангахын зэрэгцээ Зүүн хойд азийн
орнууд дахь бүс нутагтай
эдийн засгийн өргөн харилцаа нээх бололцоо олгоно” хэмээн тодотгосон. Мөн зэс,  төмрийн ордын бүтээгдэхүүнийг түүхийгээр нь зөөх явдалд цэг
тавих учиртай” хэмээн хэлсэн.
Гэхдээ энэ нь Тавантолгойгоос Хятад руу шууд төмөр зам тавихгүй гэсэн үг бас биш.  Тавантолгойгоос урд хөрш рүү чиглэх нарийн төмөр замыг ч
тавихаар төсөлд тусгасан, хамгийн гол нь газрын баялгийг эцсийн бүтээгдэхүүн болгон экспортлоход оршиж буй.

Эцсийн шийдлийг
УИХ-аас гаргах ч, УИХ дахь намын бүлгүүд одоогоор өргөн, нарийн төмөр замын төслийг
хоёуланг нь дэмжсэн уур
амьсгалтай байна.  

Ч.Сайханбилэг:

-Ардчилсан намын
бүлэг өргөн төмөр замыг дэмжиж байна уу, эсвэл нарийн уу?

-Монгол Улсын төмөр зам өргөн төмөр зам дээр
суурилсан бүтэцтэй. Засгийн газар анх энэ асуудлыг боловсруулж
эхлэх үед маршрутыг нь зүүн тийшээ, урд
зүг рүү явахаар ярьж байсан.
Одоогийн боловсруулсан төсөлд аль аль чиглэл рүү  явуулахаар оруулж ирж байна. Хуулиараа төмөр замын
бодлогыг УИХ-аар хэлэлцэн
эцсийн шийдвэр гарах учиртай. Ирэх долоо хоногт Засгийн газраас бодлогыг УИХ-д
барина гэсэн.  Ардчилсан намын бүлгийн хувьд
Засгийн газраас оруулж ирсэн төслийг дэмжсэн уур амьсгалтай байгаа.

Д.Лүндээжанцан:

-Төмөр
замын талаар төрөөс баримтлах бодлогын баримт бичгийг ярьж бйна гэж дуулдсан.
Төмөр замын маршрутыг хэрхэн тусгасан байна вэ түүнд?

-Оюутолгой, Тавантолгойн орд газрыг ашиглахтай холбоотойгоор дэд бүтцийн асуудал гарцаагүй тавигдах учраас төмөр замын бодлогыг ойрын хугацаанд УИХ
шийдвэрлэх учиртай болж байна. Засгийн газрын бодлогод хөндлөн маршрутыг гол болгосон байна.  Ингэхдээ өргөн цариг, нарийн цариг, мөн үндэсний эрх ашиг, геофолитик, уул уурхайн
баялгийг ашиглахтай холбоотойгоор нэмүү өртөг бүтээх үйлдвэрүүдийг
байгуулах. Хоёр хөрштэйгээ хамтарч ажиллах, ингэхдээ
Монгол Улсын олон жил тавьж ирсэн асуудлыг давхар шийдэх. Тухайлбал, тарифын хөнгөлөлттэй холбоотой асуудал, ч байдаг юм уу,
хийн хоолойтой холбоотой асуудал гэх мэт маш олон асуудал тавигдах учраас энэ
асуудлыг эцэслэн шийдвэрлэснээр ээдрээ зангилаа шийдэгдэх учиртай.

-Тэгэхээр Засгийн газар
нарийн төмөр зам, өргөн төмөр зам хоёуланг нь байгуулахаар зоригложээ гэж
ойлгож болох уу?

–Үүнийг Үндэсний аюулгүй байдлын зөвлөлөөр ярилцсаны дараа, мөн бодлогыг УИХ-д өргөн барьсны дараа бүлгүүдээс ажлын хэсэг гарч, УИХ-аар
хэлэлцсэний дараа шийдвэрлэнэ л дээ.

Г.Дарь