Оюутолгой төслийн Техник эдийн засгийн үндэслэлд шалгалт хийж, дүгнэлт гаргах үүрэг авсан УИХ-ын гишүүн Ш.Сайхансамбууг “ангийнхан” нь Төрийн ордонд хэзээ ирэх бол гэж өнгөрсөн долоо хоногийн турш харуулджээ. Засгийн газраас Оюутолгойн хөрөнгө оруулалтын гэрээг баталгаажуулсан энэ үед УИХ-ын Аюулгүй байдал, гадаад бодлогын байнгын хорооноос байгуулагдсан ажлын хэсгийнхний дүгнэлт чухал гэж зарим хүн үзсэн аж. Гэвч Ш.Сайхансамбуу гишүүн өвчтэй гэсэн шалтгаанаар ажлын хэсгийн хуралдааныг зарлаагүй тул, арга нь барагдсан УИХ-ын дарга гурван байнгын хорооны хамтарсан хуралдааныг зарласан нь бас л амжилт олоогүй. Тиймээс УИХ дахь намын бүлгүүд дэх Оюутолгой төслийг дэмжигсэд “Ш.Сайхансамбуу гишүүний ахалж байгаа ажлын хэсэг ирэх долоо хоногт дүгнэлтээ эцэслэн гаргаж, УИХ болоод, Засгийн газрын ажилд шавар хаахгүй байгаасай” хэмээн хүлээсээр байгаа ажээ.