Өвөл, зуны олимпийн наадам, хөлбөмбөгийн дэлхийн аварга шалгаруулах тэмцээн гээд спортын салбарын томоохон арга хэмжээг нутагтаа зохион байгуулж буй улс орон дэд бүтцийн тал дээр томоохон шинэчлэл хийдэг. Өнгөрсөн зун ДАШТ-ийг хүлээн авсан Өмнөд Африк дээрх жишгийг дагасан бол 2012 оны зуны олимпийн нийслэл Лондон хот ч ялгаагүй хэдэн сая ам.доллараар үнэлэгдэх хөрөнгөөр дэд бүтцээ сайжруулж байгаа. Харин саяхан FIFA-гийн удирдах зөвлөлийн хурлаар 2018 оны хөлбөмбөгийн дэлхийн аварга шалгаруулах тэмцээнийг нутагтаа зохион байгуулах эрх авсан ОХУ ч дээрхийн адил дэд бүтцээ сайжруулах алхмуудаа эхлүүлжээ. Өнгөрсөн долоо хоногт ОХУ-ын Ерөнхий сайд Владимир Путин 2018 он гэхэд дэлхийн аваргын тоглолтууд болох Москва, Казань, Самара болон Ульяновск хотуудыг холбосон хурдны төмөр замын системтэй болно гэдгийг албан ёсоор мэдэгдсэн байна.