Европын хөлбөмбөгийн холбоо (UEFA)-ны тэргүүн Мишель Платини дахин дөрвөн жил Буурал тивийн хөлбөмбөгийн холбоог удирдаж, 2015 он хүртэл албан тушаалдаа үлдэх нь тодорхой боллоо. UEFA-гийн ерөнхийлөгчийн сонгууль ирэх оны гуравдугаар сард Парис хотноо болох ба түүнээс гурван сарын өмнө буюу энэ сарын 22-ны дотор нэр дэвшигчид тодорхой болох ёстой байсан юм. Харин энэ удаад Платинигаас өөр нэр дэвшигч гараагүй учир ирэх дөрвөн жилд Францын домогт хөлбөмбөгч маань тивийнхээ холбоог удирдах нь тодорхой болж байна.

2007 оны сонгуулиар М.Платини 17 жил UEFA-г тэргүүлсэн Шведийн Леннарт Йоханссонг ялж, ерөнхийлөгчийн суудалд суусан бөгөөд өнгөрсөн хугацаанд Европын төдийгүй дэлхийн тавцанд чухал өөрчлөлт, шинэчлэл хийсэн билээ. Тухайлбал, Платинигийн хүчин зүтгэлээр Аваргуудын лигийн сонгон шалгаруулалтад хүчирхэг гүрний багууд хоорондоо таарах болж, улмаар жижиг, хөлбөмбөгийн хөгжлөөр харьцангуй дор багууд хэсгийн шатанд өрсөлдөх боломж нээгдсэн юм. Түүнчлэн 2012 оноос санхүүгийн шударга өрсөлдөөний дүрэм хэрэгжиж эхлэхээс гадна “Евро-2016” тэмцээнд Буурал тивийн 24 баг өрсөлдөх болсон билээ.

С.Цэлмэг