Ерөнхий боловсролын дунд сургуулийн сурагчдын III улирлын амралт ирэх долоо хоногт дуусах ч, олон нийтийн дунд хичээл эхлэх үү, үгүй юу гэдэг хүлээлттэй байна. Учир нь өнгөрсөн долоо хоногт нийслэлийн дунд сургуулийн багш нар Сүхбаатарын талбайд жагсан цалинг хоёр дахин нэмэгдүүлэхгүй бол ажил хаялт зарлана гэдгээ албан ёсоор мэдэгдсэн. Иймд бид Боловсрол, соёл, шинжлэх ухааны яамны Мэргэжлийн боловсролын газрын дарга Г.Эрдэнэчимэгээс энэ талаар тодрууллаа.
-Дунд сургуулийнхны хичээл маргааш эхлэх үү, үгүй юу. Энэ тал дээр яамны зүгээс Боловсрол, соёл,  шинжлэх ухааны үйлдвэрчний эвлэлийн байгууллагатай тохиролцсон уу?
-Ерөнхий боловсролын дунд сургуулийн хичээл ирэх долоо хоногийн мягмар гаригт эхэлнэ. Багш нар сайд Ё.Отгонбаярт цалингаа нэмэгдүүлэх шаардлагатай байгаа талаар шаардах бичиг ирүүлсэн. Энэ дагуу Боловсрол, соёл, шинжлэх ухааны яам, Нийгмийн хамгаалал, хөдөлмөрийн яамнаас холбогдох хүмүүс гарч, цалин нэмэх эдийн засгийн бололцоо байна уу гэдэг дээр судалгаа хийж эхэлсэн. Энэ ажлын хэсэгт мөн Боловсрол, соёл, шинжлэх ухааны үйлдвэрчний эвлэлийн холбооноос багш нар бас багтсан. Ажлын хэсгийнхнээс гарах шийдвэрт үндэслэж, сайд энэ сарын 10-ны дотор багтааж, тэдэнд цалинг нэмэгдүүлэх бололцоо байгаа эсэх талаар хариу өгнө.

Г.Дарь