Суут хөгжмийн зохиолч А.Моцартын мэндэлсний 255 жилийн ой ирэх онд тохиож байгаа билээ. Тиймээс Дуурийн театрын хамт олон  ирэх оныхоо үзвэрийг А.Моцартын "Увдист лимбэ" дууриар нээхээр болжээ.

Хоёр бүлэг 11 үзэгдэлтэй энэ дуурийн 210 жилийн ой давхар тохиож байгаа тул сонгодог урлагийнхан "Увдист лимбэ"-ийг сонгосон ажээ.

Тус дуурийг анх 1791 оны есдүгээр сарын 30-нд Вена хотын “Ауф дер Виден” театрт тавьж байжээ. Харин манай дуурь бүжгийн эрдмийн театрын тайзнаа 1993 оны нэгдүгээр сарын 16-нд анх тоглосон юм байна.

Дашрамд дуулгахад, суут хөгжмийн зохиолч А.Моцарт амьдралынхаа турш 22 дуурь бичсэн бөгөөд түүний хамгийн сүүлчийн бүтээл "Увдист лимбэ" юм. Энэ удаад манай дуурийн тайзнаа “Увдист лимбэ”-ийг Германы удирдаач ирж удирдах юм байна.