Жеймс Бондын дүрээрээ олны танил болсон Английн нэрт жүжигчин Дэниел Крейг Английн гоо үзэсгэлэн хэмээгддэг жүжигчин Рэйчел Вайстай “Dream House” нэртэй аймшгийн кинонд хамтран тоглож байгаа билээ. Харин тэднийг хамтран тоглогчид төдийгүй хайр дурлалын холбоотой хосууд болсон тухай Us magazine мэдээлжээ. Хосууд өнгөрсөн амралтын өдрүүдээр Сомерсетэд хамтдаа амарсан ба гар гараасаа хөтлөлцөн, аз жаргалтай яваа зургийг нь папараццичид авч амжжээ.

Дэниел Крейг таван жил хамтдаа байсан найз бүсгүй Сацуки Митчеллээс энэ оны эхээр салсан ба Хооливуудын хамгийн сайхан ганц бие залуугаар тодроод байгаа юм. Харин жүжигчин Рэйчел Вайс энэ жил дэлгэцэнд гарч шуугиан тариад байгаа “Хар хун” киноны найруулагч Даррен Аронофскигээс мөн л энэ жил сүр дуулиантай салсан юм.

Хосууд гэрлээд есөн жил болсон ба дөрвөн настай Генри Шанс хэмээх хүүтэй. Хосуудын салсан шалтгааныг нөхөр Даррен Аронофски өөр бүсгүйтэй янаг амрагийн холбоотой болсноос үүдсэн хэмээн мэдээлж байсан юм.

Ийнхүү энэ онд ганц бие болсон хоёр нэртэй жүжигчин Холливуудын сайхан хосын тоог нэгээр нэмж байна.